लमजुङ/लमजुङको सुन्दरवजार नगरपालिका ४ दुराडाँडामा निशुल्क मुटु परिक्षण शिविर भएको छ । ‘स्वास्थ्य परिक्षण गरौ, स्वस्थ जीवन बाचौ’ भन्ने नाराका साथ खनिया बन्धु समाज लमजुङ काठमाडौँ सम्पर्क समतिको पहलमा शहीद गंगालाल राष्ट्रिय ह्दय केन्द्रले मुटुरोग सम्वन्धी निशुल्क परिक्षण आयोजना गरेको हो
दुराडाँडास्थित संस्कृति सदन माध्यमिक विद्यालयमा मंगलवार भएको शिविरमा ४ सय ४० जनाले सेवा लिएका छन् । शिविरमा शहिद गंगालाल राष्ट्रिय हृदय केन्द्रका कार्यकारी निर्देशक एवं मुटुरोग विशेषज्ञ डा.चन्द्रमणि अधिकारी, डा.अमृत बोगटी, डा.रिजु मानन्धर सहितको विशेषज्ञचिकित्सकहरुको टोलीले स्वास्थ्य परिक्षण सेवा दिएका थिए ।
शिविरमा विशेषज्ञहरुद्धारा परामर्श सहित इसिजी, इको, ब्लड प्रेसर र सुगर परिक्षण गरी निशुल्क औषधि समेत वितरण गरिएको शिविर व्यवस्थापन समितिका मदनराज खनियाले वताउनुभयो । शिविरमा सञ्चालनका लागि सुन्दरवजार ४ वडा कार्यालय, सस्कृति सदन मावि र दुराडाँडा स्वास्थ्य चौकीको समेत सहयोग रहेको थियो ।
गाउँमै विशेषज्ञ सेवा सहित निशुल्क परिक्षण सेवा पाएपछि स्थानीय नागरिकले खुसी व्यक्त गरेका थिए । यसअघि फागुन ८ गते उक्त टिमले लमजङको घलेगाँउमा पनि निशुल्क मुटु परिक्षण शिविरम आयोजना गरेको थियो । शिविरमा १ सय २५ जनाले सेवा लिएको शहीद गंगालाल राष्ट्रिय हृदय केन्द्रले जनाएको छ ।
