चितवन/ जिल्लामा पहिलो पटक नेवार समुदायले सामुहिक ब्रतबन्ध र इही (बेलविवाह) कार्यक्रम गर्ने भएको छ । नेवाः पुचः नारायणगढ चितवनले शनिबार पत्रकार सम्मेलन मार्फत यही फागुन २८ र २९ गते सामुहिक ब्रतबन्ध र इही (बेलविवाह) कार्यक्रम गर्ने जानकारी दिए ।
ब्रतबन्ध संयोजक रमेशकुमार श्रेष्ठले नेवारी कला, संस्कृति, लिपी, भाषा, भेषभुषाको संरक्षण र सम्बद्र्धन गर्ने उद्देश्यले सामुहिक ब्रतबन्ध र इही (बेलविवाह) कार्यक्रम गर्न लागिएको बताए । कार्यक्रम कमलनगरस्थित नेवाः पुचःको आफ्नै भवनमा गरिने बताइएको छ ।
उक्त कार्यक्रम अन्तर्गत ब्रतबन्धका लागि रु ४ हजार प्रति बटुक र ईहीका लागि रु ३ हजार प्रति कन्या सहभागिता शुल्क लाग्ने उनले बताए । नेवार संस्कार अनुसार कन्याहरु रजस्वला नहुँदै विजोर वर्ष (५ देखि ११ वर्ष) भित्र इही गर्ने परम्परा छ ।
अहिलेको वर्तमान अवस्थामा भड्किलो र आर्थिक रुपले खर्चिलो हुने पुरोहितलगायतलाई व्यवस्थापन गर्न संस्थाले नेवार समुदायको हितलाई मध्यनजर गर्दै सो कार्यक्रम गर्न लागिएको ईही संयोजक सुषमा पियाले बताइन् । कन्याहरुको कर्म चलाउने संस्कार ईही सम्पन्न भएपछि सिउँदोमा सिन्दुर सजाउन पाउने छुट भएको संयोजक पियाको भनाइ छ ।
कार्यक्रम संस्थाका अध्यक्ष शुक्रकुमार श्रेष्ठ, भरतपुर महानगरपालिका वडा नं. १ का कार्यवाहक अध्यक्ष राममाया पिया लगायतकको उपस्थिति रहेको थियो । जिल्लामा नेवार समुदायको ४९ गुठी रहेको छ भने नेवाः पुनः नारायणगढ २०५० सालमा स्थापना भएको हो ।