वीरगन्ज/वीरगन्जमा स्रोत नखुलेको १८ लाख रूपैयाँ नगदसहित दुई जनालाई सशस्त्र प्रहरी बलले पक्राउ गरेको छ। वीरगन्ज महानगरपालिका-१६ मा पर्ने वीरगन्ज-रक्सौल सडकखण्डबाट बुधबार दुई जनालाई नगदसहित पक्राउ गरिएको सशस्त्र प्रहरीका सहायक प्रवक्ता प्रहरी नायब उपरीक्षक (डिएसपी)शैलेन्द्र थापाले जानकारी दिए। भारतका २६ वर्षीय राकेश कुमार र २७ वर्षीय प्रसंजित कुमारलाई सशस्त्र प्रहरी बल नेपाल नम्बर १३ गण पर्साबाट सशस्त्र प्रहरी उपरीक्षक (एसपी)सुमन थपलिया कमाण्डको टोलीले उक्त रूपैयाँसहित पक्रेको हो।

भारतीय नम्बर प्लेटका दुइटा मोटरसाइकलमा नेपालतर्फ आउँदै गरेका राकेश कुमारको हेल्मेटभित्र ९ लाख र प्रसंजित कुमारको हेल्मेटभित्र ९ लाख नेपाली रूपैयाँ बरामद भएको हो। यस्तै प्रतिबन्धित ५ सय दरका चार थान भारतीय रूपैयाँ समेत फेला परेका थियो।उनीहरूले उक्त रकमको स्रोत खुलाउन नसकेपछि पक्राउ गरेको डिएसपी थापाले बताए।उनीहरूलाई थप अनुसन्धानका लागि जिल्ला प्रहरी कार्यालय पर्सामा बुझाइएको छ।