लमजुङ/पुर्वि लमजुङको राइनास नगरपालिका वडा नं. ६ धमिलिकुवा स्थित गौलीटारमा दोस्रो राइनास कप खुल्ला फुटबल प्रतियोगिता २०७९ हुने भएको छ । गौलीटार क्षेत्रीय खेलमैदान समितीले आगामी फागुन १० गतेदेखि राइनास कपको दोस्रो संस्करण आयोजना गर्ने भएको हो ।

समितीले मंगलवार धमिलिकुवामा पत्रकार सम्मेलन गर्दै प्रतियोगिता आयोजना वारे जानकारी गराएको हो । समितिका अध्यक्ष किरण श्रेष्ठले यसवर्ष आयोजना हुने दोस्रो संस्करणको राइनास कपमा कम्तिमा पनि १६ टिम सहभागिताको अपेक्षा गरिएको वताउनुभयो । गतवर्ष १२ टिम सहभागि थिए । गतवर्ष प्रथम पुरस्कार राशी १ लाख ५० हजार रुपैया राखिएकोमा समितीले यसवर्ष ५० हजार वढाएर २ लाख पुर्याएको अध्यक्ष श्रेष्ठले वताउनुभयो ।

प्रतियोगिताको विजेताले २ लाख नगद सहित कप, मेडल र प्रमाणपत्र पाउनेछन् भने उपविजेतालाई नगद १ लाख रुपैयाँ, कप, मेडल र प्रमाणपत्र प्रदान गरिनेछ । यसैगरी सेमिफाइनल पुग्ने दुई टिमलाई २०/२० हजार रुपैया नगद पुरस्कारको व्यवस्था गरिएको अध्यक्ष श्रेष्ठले वताउनुभयो । सर्वोत्कृष्ट खेलाडी, उत्कृष्ट गोलकिपर र सर्वाधिक गोलकर्तालाई पाँच/पाँच हजार र प्रमाणपत्र, हरेक खेलमा म्यान अफ दि म्याच घोषणा गरी १ हजार रुपैया दिइनेछ ।

११ ए साइडको गौलीटार क्षेत्रीय खेलमैदानमा हुने प्रतियोगितामा एक टिमबाट ११ जना खेलाडी खेलाइनेछ भने एउटा टिमबाट १ जना कोच तथा म्यानेजरसहित १८ जना खेलाडी आह्वान  गरिएको आयोजकले जनाएको छ यसवर्षको प्रतियोगिता सञ्चालनको लागि १५ लाख ४५ हजार रुपैयाँ खर्च हुने आयोजकको अनुमान छ  । प्रथम राइनास कपमा ८ लाख विनियोजन गरेको राइनास नगरपालिकाले यसवर्ष पनि प्रतियोगिताको लागि  ८ लाख रुपैया दिने निर्णय गरिसकेको जानकारी गराउदै अध्यक्ष श्रेष्ठले फुटबल प्रतियोगितालाई राइनासकै मेलाको रुपमा अघि वढाउने बताउनुभयो ।

कार्यक्रममा राइनास नगरपालिका ६ का वडाअध्यक्ष गोविन्दराज चिलुवालले खेलकूदका माध्ययमबाट राइनास नगरको प्रचारप्रसार गरिने बताउनुभयो । नगरपालिकाले खेलकूदलाई प्राथामिकतामा राखेको भन्दै यसपटक गौलीटारको फुटवल प्रतियोगिताको लागि ८ लाख विनियोजन गरेको र आगमी वर्षदेखि कार्यविधि बनाएर बजेट विनियोजन गरिने वडाअध्यक्ष चिलुवालले बताउनुभयो ।

पत्रकार सम्मेलनमा गौलीटार क्षेत्रीय खेलमैदान समितिका संस्थापक उपाध्यक्ष दुर्गा वहादुर रानाभाट, नगरपालिकाका निवर्तमान कार्यपालिका सदस्य अर्जुन भूजेल, खेलमैदान समितीका कोषाध्यक्ष बेदप्रसाद भुजेल, सदस्यहरु नारायण नेपाली, सुनिल श्रेष्ठ लगायतको उपस्थिति थियो । कार्यक्रमको संचालन सचिव सिताराम पाण्डेले गर्नुभएको थियो । समितिले प्रतियोगिताका व्यापार, व्यवसायि, संघ सस्था, जिल्लाका स्थानीय तहहरु, स्थानीय तथा स्वदेश तथा विदेशमा रहने व्यक्तिहरुसँग सहयोगका लागि अनुरोध गर्ने समेत जनाएको छ ।