नारायणगढ/कोरोना भाइरस (कोभिड–१९) संक्रमण रोकथामका लागि नेपाल सरकारले लकडाउन गरेसँगै दैनिक श्रम गरेर जीविकोपार्जन गर्ने तथा निजहरुमा आश्रित बालबालिका, अपाङ्ग तथा बृद्धबृद्धाहरुहरुलाई खाद्यान्नको अभावले दैनिक गुजारा गर्न समेत समस्या परेको सन्दर्भमा होटल व्यवसायी संघ–चितवन र लायन्स क्लव अफ नारायणीले संयुक्त रुपमा बैशाख १३ गतेदेखि १७ गतेसम्म सञ्चालन गरिएको निःशुल्क खाना खुवाइने कार्यक्रम अन्तर्गत १६४७ जनालाई निःशुल्क रुपमा खाना खुवाइयो ।

खाना वितरण कार्यक्रममा होटल व्यवसायी संघ–चितवनकी अध्यक्ष शर्मिला न्यौपाने सहित पदाधिकारीहरु र लायन्स क्लव अफ नारायणीका अध्यक्ष राजन गौतम सहित पदाधिकारीहरुको समेत सहभागिता रहेको थियो ।

कार्यक्रमलाई होटल व्यवसायी संघ–चितवन र लायन्स क्लव अफ नारायणीले संयुक्त रुपमा सञ्चालन गरेका थिए । विभिन्न सहयोगी हातहरुको २८ हजार १ सय रुपैयाँ सहयोग सहित करीब दुईलाख ५० हजार रुपैयाँ खर्च लागतमा खाना खुवाइएको होटल व्यवसायी संघ–चितवनका उपाध्यक्ष कृष्ण भट्टले जानकारी दिनुभयो ।

आफू पनि सजग रही, अरुलाई पनि सुरक्षित राखौ साथै नियमित साबुन पानीले हात धोई सामाजिक दुरी कायम गरौं भन्ने मूल नाराका साथ लकडाउनका कारण विपद्मा परेका मजदुर तथा विपन्न वर्गहरुका लागि निःशुल्क खाना वितरण गरिएको थियो ।
देशभरी नै लगडाउन गरेको यस अवस्थामा दैनिक रोजगारी गरेर जीवनयापन गरिरहेका विपन्न वर्गका परिवारहरुलाई विभिन्न क्षेत्रबाट सहयोगहरु दिने कार्यहरु पनि चलिरहेको छ ।