लमजुङ/लमजुङ गोरखा सिमानामा निर्माणाधिन चेपे ए जलविद्युत आयोजना र राईनासटार सिँचाई आयोजना उपभोक्ता विचको विवाद चर्किदै गएको छ । जलविद्युत आयोजना विरुद्ध आन्दोलनमा उत्रिएका उपभोक्ताहरु मध्ये आठजनालाई पक्राउ गर्न खोजेको भन्दै उपभोक्ताहरु थप आक्रोशित बनेका हुन् ।

आक्रोशित सिचाई उपभोक्ताहरुले शुक्रबार राईनासको तिनपिप्लेमा जलविद्युत आयोजना विरुद्ध नाराबाजी सहित विरोध गरेका छन् । केहि साताअघि जलविद्युत आयोजनामा भएको तोडफोडका विषयलाई लिएर आठजना उपभोक्ता विरुद्ध उजुरी परेको र प्रहरी प्रशासन लगाएर पक्राउ गर्न लागेको भन्दै उपभोक्ताहरु थप आन्दोलित भएको संघर्ष समिति संयोजक श्रीकृष्ण पौडेलले जानकारी दिनुभयो ।

सिँचाई आयोजना प्रभावित हुनेगरी जलविद्युत आयोजना निर्माण गर्ने र उल्टै उपभोक्ता विरुद्ध मुद्धा दायर गरी आक्रोशित बनाएको उपभोक्ताहरुको आरोप छ । सिँचाई प्रभावित हुनेगरी कुनैपनि हालतमा जलविद्युत आयोजना बन्न नदिने अडान लिएका स्थानिय उपभोक्ताहरुले विरोध प्रदर्शनका क्रममा झुठा मुद्दा खारेज गर, धरपक्कड बन्द गर, जल माफिया होसियार, किसान ओन्दालन जारी छ, सिंचाईको सुनिश्चित गर, आम राइनासबासी एक छौं जस्ता नारा लगाएका थिए । उपभोक्ताहरुले शुक्रबारको प्रदर्शन साँकेतिक भएको भन्दै सशक्त विरोधमा उत्रने चेतावनी दिएका छन् ।

चम्पावती हाईड्रोले राईनासटार सिँचाई आयोजना प्रभावित हुनेगरी जलविद्युत आयोजना निर्माण गरेको भन्दै राईनासबासी विगत एक महिनादेखि विरोधमा उत्रिएका छन् । पटक–पटक वार्ताको माध्यामबाट समास्या समाधान गर्न चाहेपनि हाईड्रो तर्फबाट वार्ताको कुनै संकेत नदेखिएपछि आक्रोशित उपभोक्ताहरु आयोजनाको निर्माणाधिन पावरहाउस घेराउ गर्न पुगेका थिए । सोहि समयमा आयोजनाको केहि सवारीमा आगजनी सहित पावर हाउस संचनामा तोडफोड समेत भएको थियो ।

आक्रोशित भिडको विचमा आयोजनाकै मान्छेहरुले तोडफोड गरी आँफुहरुलाई आरोप लगाएको उपभोक्ताहरुको आरोप छ भने जलविद्युत आयोजनाले भने उपभोक्ता मध्येका आठजना विरुद्ध जिल्ला प्रशासन कार्यालय गोरखामा किटानी जाहेरी दिएको छ । जलविद्युत आयोजनाका तर्फबाट दिईएको जाहेरीमा किटान आठजनालाई गोरखा प्रशासनबाट हाजिर हुन पत्रचार गरेको संकेत पाएसँगै उपभोक्ताहरु थप आन्दोलित भएका हुन् । उनिहरुले स्थानिय सरकारदेखि सम्वन्धीत विभाग हुँदै केन्द्र सरकारसम्म पुगेर पनि सिचाईको प्रत्याभुति नहुँदा सम्म जलविदुत आयोजना बन्न नदिने अडान लिएका छन् ।

चम्पावती हाईड्रोद्धारा निर्माणाधिन सात मेगावाट चेपे ए जलबिद्युत आयोजना र राईनासका स्थानियविच भएको विवादका बारेमा जिल्लाका साँसद एवं राजनितिक दल, स्थानिय सरकार एवं सरोकारवालाहरुले स्थानियको आन्दोलनमा ऐक्यबद्धता जनाएका हुन् । जलबिद्युत आयोजनाको कारण राईनासटार सिँचाई आयोजना प्रभावित हुन नहुने भन्दै समयमै सच्चिन विज्ञप्ती मार्फत सरोकारवालाहरुले यसअघिनै आग्रह गरेका छन् ।