संखुवासभा/संखुवासभाको भोटखोला गाँउपालिकाको हटियामा अनुमति बिना हेलिकोप्टर उडान भरेको भन्दै प्रहरीले अल्टिच्यूड एयरको हेलिकोप्टर नियन्त्रणमा लिएको छ । गृह मन्त्रालयले दिएको उडान अनुमति विपरित निषेधित क्षेत्रमा उडान भरेको भन्दै प्रहरीले अल्टिच्यूड एयरको ९ एन एएमएक्स कल साईनको हेलिकोप्टर नियन्त्रणमा लिएको हो । मंगलबार बिहान काठमाडौंबाट संखुवासभाको भोटखोला गाँउपालिकामा रहेको टेलिकमको टावर सञ्चालनका लागि उक्त जेनेरेटर ल्याइएको हो । प्रहरीले गृह मन्त्रालयको अनुमतिमा काठमाडौंबाट निषेधित क्षेत्रमा जानु भन्दा पहिले जिल्ला प्रहरी कार्यालय खाँदबारीमा अवतरण गरी जाँच पासपछि मात्रै भोटखोलाको हटियामा उडान भर्ने अनुमति रहेको थियो ।
अनुमति विपरित उडान भरेको भन्दै प्रहरीले हेलिकोप्टरका पाइलट आनन्द थापालाई नियन्त्रणमा लिई प्रहरी चौकी हटियामा राखेकोे सोही गाउँपालिकाका अध्यक्ष वाङछेदर भोटेले बताउनुभयो । उहाँले हेलिकोप्टर गाँउपालिकाकै पहलमा भोटखोलाकै माक्पालुङमा रहेको टेलिकम टावर सञ्चालनका लागि जेनेरेटर ल्याएको र गोला प्रहरी चौकी, जनप्रतिनिधि र टेलिकमका कर्मचारी लगायतको रोहबरमा हेलिकोप्टरबाट जेनेरेटर हटियामा निकालिएको बताउनुभयो ।
अध्यक्ष भोटेले भोटखोलावासी सञ्चारको क्षेत्रबाट वञ्चित भएको र सोलरबाट टेलिकमको टावर सञ्चालनमा सधै अवरोध भएपछि गाउँपालिकाकै पहलमा जेनेरेटर ल्याउदा प्रहरीले हेलिकोप्टर र पाइलट नियन्त्रण गर्नु दुस्खत भएको र भोटखोलालाई हेर्ने दृष्ट्रिकोण फरक रहेको समेत आरोप लगाउनुभयो । यता प्रहरीले घटनाको बारेमा गृह मन्त्रालयलाई पत्र लेखि पठाएको र गृहकै निर्देशन अनुसार प्रकृया अगाडि बढाउने जनाएको छ ।
