गोरखा/गण्डकी गाउँपालिका वडा नं ८ सिउरेनीटारमा लुगा धुने साबुनको उत्पादन सुरु भएको छ । त्रिशक्ति साबुन उद्योगद्वारा ‘दुर्गा’ नामको साबुन उत्पादन सुरु भएको हो । विहिबार एक कार्यक्रम गरी गाउँपालिकाका अध्यक्ष दिपक तिमिल्सिनाले त्रिशक्ति साबुन उद्योगको उद्घाटन गरेका हुन् । उद्योगको उद्घाटन गर्दै अध्यक्ष तिमिल्सिनाले आयआर्जन र आर्थिक विकासका विकासमा उद्योगले धेरै ठूलो सहयोग पुग्ने बताए । उद्योगमा उत्पादन भएका साबुन गण्डकी प्रदेशमा मात्र नभई अन्य प्रदेशमा पनि ग्राहक विस्तार गर्नुपर्नेमा उनले जोड दिए ।
त्यस्तै, उत्पादनलाई व्यवसायिकतातर्फ जोड्न सकेमा मात्र उद्योगी, व्यवासयी र गाउँपालिकाले विकास र समृद्धिको लक्ष्य हासिल गर्न सक्ने अध्यक्ष तिमल्सिनाले बताए । गरिबी निवारणको लागि लघु उद्यम कार्यक्रम ‘मेडपा’ अन्तरगत त्रिशक्ति लघु उद्यमी समुहले साबुन उद्योग संचालनमा ल्याएको हो ।
त्रिशक्ति कम्पनीले हाल निलो र कालो गरी दुई प्रकारको लुगा धुने साबुन उत्पादन सुरु गरेको छ । अहिले उत्पादन गरी स्टक गरेर राखिएको र अब बजार व्यवस्थापनमा ध्यान दिने बताइएको छ । कम्पनीले हाल मेसिन, सवारी साधन सबै गरी करिब ६० लाखभन्दा बढी लगानी गरेको कम्पनीका प्रोपाइटर शम्भु भुजेलले बताए । ‘अहिले कपडा धुने दुई प्रकार साबुन मात्र उत्पादन थालेका छौँ । अब उत्पादित साबुनलाई बजार व्यवस्थापनमा जोड दिन्छौ,’ उनले भने । दैनिक तीन टनसम्मको साबुन उत्पादन गर्न सक्ने क्षमताको मेसिन जडान गरिएको बताउँदै अहिले आवश्यकता अनुसार मात्र साबुन उत्पादन भइरहेको उनले बताए । बजारमा माग भए अनुसार उत्पादनको दरलाई वृद्धि गर्दै लैजाने उनले योजना बनाएका छन् । हाल साबुन उत्पादनका लागि कच्चा पदार्थ भक्तपुरबाट ल्याउने गरेको उनले जानकारी दिए ।
