भरतपुर/चीनको युआन प्रान्तबाट शुरु भएको कोरोना भाइरस (कोभिड–१९) ले यतिबेला विश्वलाई नै त्रसित बनाएको छ । जसका कारण विश्वकै अर्थतन्त्रले ठूलो क्षति व्यहोर्नु परेको अवस्था छ ।
नोभेल कोरोना भाइरस संक्रमण रोकथाम तथा नियन्त्रण पूर्व तयारी गर्नका लागि विभिन्न क्षेत्रबाट विभिन्न खाले सहयोगहरु समेत भईरहेका छन् । भरतपुर महानगरपालिकाकी प्रमुख रेनु दाहालको संयोजकत्वमा बसेको कोरोना रोकथाम समितिको विशेष अनुरोधमा चितवन उद्योग संघको पहलमा निर्माण भईरहेको चितवन प्रदर्शनी केन्द्रका तीनवटा हलहरुलाई कोरोना विशेष अस्थायी अस्पताल बनाउन व्यवस्था गरिएको थियो ।
विज्ञहरुको रायसुझाव, नजिक खासै घनावस्ती नभएको, तयारी संरचना र आईसोेलेसनलाई उपयुक्त स्थान भएका कारण उक्त प्रदर्शनी केन्द्रलाई कोराना अस्पतालको प्रस्तावलाई सहर्ष स्वीकार गरिएको चितवन उद्योग संघका अध्यक्ष राजु पौडेलले जानकारी दिनुभयो । अध्यक्ष राजु पौडेल भन्नुहुन्छ–“ कोरोना भाइरस (कोभिड–१९) बाट विश्वनै महामारीको रुपमा रहेको यस परिस्थतिमा संघको तर्फबाट पनि सामाजिक उत्तरदायित्व बहन गर्ने उद्देश्यका साथ उक्त तीनवटा प्रदर्शनी हलहरु अस्पताल प्रयोगका लागि दिएका हौं ।” पौडेल भन्नुहुन्छ –“हामी उद्योगीहरुले सामाजिक उत्तरदायित्व वहन गर्न यस्ता खालका विपद्हरुको समाधानको लागि हातमा हात मिलाएर अघि बढ्नु नै उत्तम हुनेछ ।” चितवन उद्योग संघको तर्फबाट कोरोना भाइरस (कोभिड–१९) को निर्मूल र समाधानको लागि हरेक गतिविधिहरुमा आफू र आफ्नो संघ सधैं तयार रहेको समेत पौडेलको भनाई छ ।
चितवन उद्योग संघको चितवन प्रदर्शनी केन्द्रमा शुरु गरिएको भरतपुर कोरोना विशेष अस्पतालमा ५० वटा जनरल वेड, १० वटा एचडियू  र १० वटा आईसियु वेड सहित बिरामीहरुको उपचार शुरु गरिएको चितवन उद्योग संघका अध्यक्ष राजु पौडेलले जानकारी दिनुभयो ।