भरतपुर/ सनराइज इङ्लिस स्कुल, भरतपुरको ३५औँ वार्षिकोत्सव सम्पन्न भएको छ । विद्यालयका प्रिन्सिपल शिवकुमार बगालेले स्वागत मन्तव्यका साथमा विद्यालय प्रतिवेदन प्रस्तुत गरेर सुरूवात गरेको कार्यक्रम मंसिर १३ गते नर्सरीदेखि कक्षा ५ सम्मका विद्यार्थीहरू लक्षित कार्यक्रम भएको थियो भने १४ गते कक्षा ६ देखि १२ सम्मका विद्यार्थी लक्षित कार्यक्रम भएको थियो । दुवै दिन विद्यार्थीले नियमित कक्षाकोठामा अध्यापन हुने शिक्षण सिकाइका साथै गीत, सङ्गीत, नाटक, नृत्यलगायतका विभिन्न विधामा आफ्नो प्रस्तुति दिएका थिए ।
विद्यालय व्यवस्थापन समितिका अध्यक्ष रामजीप्रसाद अर्यालको सभापतित्वमा सञ्चालित कार्यक्रममा १३ गते प्रमुख अतिथिका रूपमा शिक्षा विकास तथा समन्वय इकाइका प्रमुख भूमिलाल सुवेदी रहेको थिए भने विशेष अतिथिका रूपमा चौधरी ग्रुप बिजिनेश युनिट प्रमुख गर्ली अग्रवाल, भरतपुर महानगर प्याव्सनका अध्यक्ष लेखनाथ खनाल र सनराइज स्कुल चितवन प्रालिका अध्यक्ष हेमराज शर्मा रहेका थिए ।
कार्यक्रममा प्रमुख अतिथि भूमिलाल सुवेदीले सनराइजका विद्यार्थीहरू पढाइको क्षेत्रमा सधैँ देशकै उत्कृष्ट विद्यालयहरूमध्ये र विद्यालयले सञ्चालन गरेको अतिरिक्त क्रियाकलापद्वारा विद्यार्थीहरूले प्रदर्शन गरेको कला क्षेत्र पनि उत्कृष्ट रहेको कुरा जानकारी गराए ।
यसैगरी विशिष्ट अतिथि प्याव्सन भरतपुरका अध्यक्ष लेखनाथ खनालले सनराइज स्कुल स्थापनाकालदेखि अनवरतरूपमा शिक्षाक्षेत्रमा आफ्नो पहिचानसाथ अगाडि बढेकोमा अझ सफलताको शुभकामना दिए । १४ गतेको कार्यक्रममा प्रमुख अतिथिका रूपमा राष्ट्रिय परीक्षा बोर्डका अध्यक्ष डा. महाश्रम शर्मा रहेका थिए । सनराइज इङ्लिस स्कुल चितवन जिल्लाको मात्र नभई देशमै आफ्नो पहिचान स्थापना गर्न सफल एक विद्यालय भएको कुरा शर्माले जानकारी गराए । समापन कार्यक्रममा विशिष्ट अतिथि प्याव्सन चितवनका अध्यक्ष कीर्तिनिधि अर्यालले सनराइज देशकै एक सफल विद्यालय रहेको कुरा जानकारी गराए ।
