खैरहनी/चीनको युआन प्रान्तबाट शुरु भएको कोरोना भाइरस (कोभिड–१९) ले यतिबेला विश्वलाई नै त्रसित बनाएको छ । जसका कारण विश्वकै अर्थतन्त्रले ठूलो क्षति व्यहोर्नु परेको अवस्था छ ।
नोभेल कोरोना भाइरस संक्रमण रोकथाम तथा नियन्त्रण पूर्व तयारी गर्नका लागि विभिन्न क्षेत्रबाट विभिन्न खाले सहयोगहरु समेत भईरहेका छन् ।
त्यसै अनुरुप खैरहनी–८, पर्सामा रहेको पाथिभारा कम्प्लेक्सका सञ्चालक चितवन उद्योग संघका युवा उद्यमी अनिल श्रेष्ठ, किशोर सागर अधिकारी, रसिक पाण्डे र बासु डल्लाकोटीहरुले संयुक्त रुपमा कोरोना भाइरस (कोभिड–१९)बाट व्यवसायीहरुमा परेको मर्कालाई ध्यानमा राख्दै एक महिनाको सटर भाडा वापतको एकलाख २५ हजार रुपैयाँ नलिने घोषणा गरेका छन् ।
युवाहरुको यस्तो खाले कार्यले उद्योगी, व्यवसायीहरुमा केही मात्रमा भएपनि राहत मिलेको चितवन उद्योग संघ खैरहनी इकाई समितिका सचिव डोलबहादुर कार्की (अबिनाश)ले बताउनुभयो । विपद्को समयमा जसले जसरी सहयोग गर्न सकिन्छ त्यो नै महत्वपूर्ण काम हो भन्दै युवा व्यवसायीहरुको उक्त कार्यको स्वागत समेत गर्नुभयो ।
कम्पेल्क्समा हाल होटल, व्युटीपार्लर, कपडा पसल लगायत १२ वटा व्यवसाय सञ्चालन हँुदै आएका छन । सञ्चालकहरुले केहीबर्ष अघिदेखि सो स्थानमा जग्गा भाडामा लिएर कम्पेल्कस सञ्चालन गर्दै आएका थिए ।