नारायणगढ/भारतको गुजरातस्थित सुरत शहरमा २००७ देखि आफ्नो सेवा दिदै आईरहेको गुरुङस मःमः सरकार एण्ड क्याफेले चितवनको लायन्सचोकमा आफ्नो पहिलो शाखा सञ्चालनमा ल्याएको छ । चितवनमा एकहप्तादेखि मःमः का पारखीहरुलाई आफ्नो उत्पादनहरुको स्वाद चखाउँदै आएको क्याफे नेपालमा पहिलो शाखाको रुपमा चितवनबाट शुरु गरेको सञ्चालक एवम् मःमः सेफ राजेश गुरुङले बताउनुभयो ।
एकलाख असी हजार भारतीय रुपैयाँबाट शुरु गरेको क्याफले शुरुको दिन साठी रुपैयाँको व्यापार गरेको थियो । व्यापारको क्रम बढ्दै जाँदा मःमःका पारखीहरु बढ्दै गएपछि भारतकै विभिन्न स्थानमा ४ वटा शाखाहरुबाट आफ्ना ग्राहकहरुको मन जित्दै आएको छ । ४ वटा शाखाहरुमा ३२ देखि ३५ जना कर्मचारीहरुले रोजगारी समेत पाएका छन् ।
भारतमा अत्याधिक रुचाइएको मःमःको ब्राण्डलाई नेपालमा पनि ल्याउनु पर्छ भन्ने मान्यता राख्दै सञ्चालकहरुले चितवनको लायन्सचोकमा आफ्नो पहिलो शाखाबाट ग्राहकहरुलाई सेवा प्रदान गर्दै आईरहेको छ । ५० लाख रुपैयाँ लगानीमा सञ्चालनमा ल्याइएको गुरुङस मःमः सरकार एण्ड क्याफे (गुरुङ चाइनिज कर्नर)मा कुरकुरे मःमः, झोल मःमः, फ्राईस राईस, पनिर चिल्ली, नुडल्स, काटी रोल लगायतका चाइनिज फुडहरुको समेत स्वाद लिन पाईन्छ ।
भारतमा धेरै भन्दा धेरै रुचाइएको तन्दुरी मःमः यहाँको प्रमुख विशेषता रहेको हुँदा यसलाई छिट्टै ग्राहक सामु ल्याउने सञ्चालकको दावी छ । विगत लामो समयदेखि यस क्षेत्रमा लामो अनुभव सम्हाल्दै आएका सेफबाट तयार गरिने र सरसफाईलाई विशेष ध्यानमा राखी ग्राहकहरुलाई सेवा दिने उद्देश्य रहेको सञ्चालकहरु बताउँछन् । हाल चितवनको एक स्थानबाट आफ्नो सेवा प्रदान गर्दै आएको गुरुङस मःमः सरकार एण्ड क्याफेले चितवन लगायत नेपालका अन्य स्थानहरुमा समेत आफ्नो सेवा बिस्तार गर्ने योजना लिएको छ ।
