चितवन/चितवन क्षेत्र नम्बर २ गठबन्धन सचिवालयकोे शनिबार एक समारोहबीच उद्घाटन गरिएको छ । भरतपुर महानगरपालिका वडा नम्बर १० स्थित चितवन मेडिकल कलेज अगाडि चुनावी प्रचार प्रसार अभियानको लागि कार्यालयको उद्घाटन गरिएको हो ।
सत्ता गठबन्धनको तर्फबाट क्षेत्र नम्बर २ प्रतिनिधिसभा सदस्य पदकाका उम्मेदवार उमेश श्रेष्ठले गठबन्धनको जित नै जनताको जित भएको बताए । उनले आफ्नो उम्मेदवारी शिक्षा, स्वास्थ्य रोजगारीको लागि भएको भन्दै आफूले चुनाव जितेमा १० बर्षमै चितवनलाई कायापलट गर्न सकिने बताए ।
‘म आफै गरिखाने अभियानको अभियन्ता हो’ उनले भने, युवाहरुलाई रोजगारी जोड्नको लागि पनि मैले उम्मेदवारी दिएको हुंँ ।’ यो चुनाव आफू एक्लैको नभएको भन्दै उनले जनताको हातमा नतिजा भएको बताए ।  आफू लामो समय शिक्षा क्षेत्रमा रहेको र  निस्वार्थ भावका साथ राजनीतिमा लागेको भन्दै चितवनको परिवर्तनको लागि उम्मेदवारी दिएको बताए । ‘देशमा व्यवस्था परिवर्तन भयो, अवस्था परिवर्तन भएन’ उनले भने, ‘मेरो उम्मेदवारी स्थायी राजनीति र समृद्धिको लागि हो ।’
सत्ता गठबन्धनका जिल्ला संयोजक राजेश्वर खनालले चितवनलाई समानुपातिक विकास गर्न पनि गठबन्धनलाई जिताउनु आवश्यक रहेको बताए । चितवनको शिक्षा, स्वास्थ्य, रोजगारी लगायतका क्षेत्रमा परिवर्तन ल्याउन पनि गठबन्धनलाई जनताले जिताउनु पर्ने उनको भनाइ छ  ।
क्षेत्र नम्बर प्रदेश २ क गठबन्धनका उम्मेदवार घनश्याम दाहालले आफूहरु जनताको प्रतिनिधि पात्र मात्र भएको बताए । ‘हामी त एउटा प्रतिनिधि पात्र मात्र हौं’ उनले भने, ‘जनता सबै उम्मेदवार हुन् ।’ आफूले वाग्मती प्रदेश मन्त्री हुंँदा पनि चितवनको लागि दर्जनौं काम गरेको बताउंँदै उनले बांँकी काम गर्न जनताले मतदान गर्नेमा आफू विश्वस्त रहेको बताए । आफूले जनताको काम गर्दै आएको भन्दै उनले सवारी अनुमति पत्र वितरणका लागि प्रविधिमैत्री व्यवस्था गर्न सफल भएको बताए ।
प्रदेश २ ख का उम्मेदवार उत्तम जोशीले शान्ति, समृद्धि र परिवर्तनको लागि गठबन्धन चुनावी अभियान लागेको भन्दै प्रतिगामीलाई परास्त गर्न पनि गठबन्धनले जित्न आवश्यक रहेको बताए । देशमा विभिन्न कालखण्डमा आन्दोलन भए पनि अहिलेसम्म देशले मुहार फेर्न नसकेको भन्दै जोशीले देशको मुहार फेर्ने कामको नेतृत्व सत्ता गठबन्धनले लिनुपर्ने बताए । आफ्नो उम्मेदवारी चितवनमा  शान्ति, समृद्धि र विकासको लागि रहेको उनको भनाइ छ ।
नेपाली कांँग्रेस चितवनका पूर्व सभापति जितनारायण श्रेष्ठले गठबन्धनले तीन वटै क्षेत्र जित्ने गरी चुनावी अभियानलाई तीब्र पार्नु पर्ने बताए । गठबन्धनका उम्मेदवार चितवनको विकासको लागि योग्य पात्र रहेको भन्दै उनले भने, ‘क्षेत्र नम्बर १ मा विश्व पौडेल हुनुहुन्छ । उहांँ आगामी सरकारको अर्थमन्त्रीको योग्य उम्मेदवार हो । क्षेत्र नम्बर २ मा शिक्षाविद उमेश श्रेष्ठ हुनुुहुन्छ । उहांँ शिक्षा मन्त्रीको लागि योग्य उम्मेदवार हो । तीन नम्बर क्षेत्रमा डाक्टर भोजराज अधिकारी हुनुहुन्छ । उहांँ स्वास्थ्य मन्त्रीको लागि योग्य उम्मेदवार हो ।’
प्रतिगामीलाई परास्त गर्दै गठबन्धनले जित हासिल गर्नुपर्ने भन्दै उनले सबैले आफ् आफ्नो क्षेत्रबाट चुनावी अभियान र एजेण्डालाई जनतासामु लैजानुपर्ने बताए । कार्यक्रममा नेपाल कम्युनिष्ट पार्टी एकीकृत समाजवादीका जिल्ला उपाध्यक्ष कृष्ण न्यौपाने लब्ली, राष्ट्रिय जनमोर्चाका जिल्ला अध्यक्ष डम्बर पुरीलगायतले मन्तव्य राखेका थिए ।
कार्यक्रम नेपाली काँग्रेस क्षेत्र नम्बर २ का सभापति भरत लामिछानेको अध्यक्षतामा सम्पन्न भएको थियो । सचिवालय उद्घाटन कार्यक्रममा गठबन्धनका उम्मेदवार, पांँच दलका नेता तथा कार्यकर्ताको सहभागिता रहेको थियो ।