नारायणगढ/मानवीय सेवाको भावनाबाट अभिप्रेरित भई स्वस्तिक नेपालको आयोजना र नविन अटो सेन्टरको सहयोगमा सम्पन्न खुल्ला रक्तदान कार्यक्रममा ३९ जनाले रक्तदान गरेका छन् । स्वस्तिक नेपालका अध्यक्ष राजन अधिकारीको अध्यक्षतामा सम्पन्न खुल्ला रक्तदान कार्यक्रममा भरतपुर महानगरपालिका वडा नं. ३ का वडाअध्यक्ष विकास थापा प्रमुख अतिथि रहनुभएको थियो ।
प्रमुख अतिथि थापाले रगत अभावका कारण बिरामीहरुलाई सेवा प्रवाह गर्न कठिनाई भईरहेको परिप्रेक्ष्यमा रगतको अभाव खड्किन नदिनका लागि सहयोग पुग्ने उद्देश्य अनुरुप स्वस्तिक नेपालले आयोजना गरेको रक्तदान कार्यक्रम निकै फलदायी भएको बताउनुभयो ।
कार्यक्रमका संयोजक कपिल सागर कर्माचार्यले स्वागत मन्तव्य राख्नुभएको कार्यक्रममा प्रमुख अतिथि थापाले रक्तदाता गोपाल प्रसाद भट्टराई र नवराज फुयाँललाई ब्लड व्याग हस्तान्तरण गरी कार्यक्रमको उद्घाटन गर्नुभएको थियो । स्वस्तिक नेपालका संस्थापक अध्यक्ष हिरामान महर्जन र नेपाल रेडक्रस सोसाइटी नारायणगढ उपशाखाका सभापति राजकुमार गुप्ताले कार्यक्रमको सफलताको शुभकामना मन्तव्य राख्नु भएको थियो ।
स्वस्तिक नेपालका महासचिव विमल अधिकारीले सञ्चालन गर्नुभएको खुल्ला रक्तदान कार्यक्रमलाई स्वस्तिक नेपालका अध्यक्ष राजन अधिकारीले धन्यवाद मन्तव्य सहित समापन सहित रक्तदाताहरुलाई रक्तदानको लागि सरिक भईदिनुहुन अनुरोध समेत गर्नुभयो ।
