भरतपुर/पूर्वमन्त्री तथा राप्रपाका उपाध्यक्ष विक्रम पाण्डेले मंसीर ४ मा राष्ट्रवादी नेताहरुले जित्ने दाबी गर्नुभएको छ । राप्रपा क्षेत्रीय समिति क्षेत्र नम्बर १ चितवनले आयोजना गरेको शुभकामना आदानप्रदान कार्यक्रमलाई सम्बोधन गर्दै पूर्वमन्त्री पाण्डेले मंसीर ४ लाई जनताको जित हुने दिन बनाउन आव्हान गर्नुभएको छ । सत्तामा रहेका दलहरुका कामबाट आजित भएकाले जनताले विकल्प खोजिरहेको बताउनुभयो ।

उहाँले सम्भावनानै सम्भावना भएको देशलाई कंगाल बनाउने र विदेशीको इशारामा चल्ने र काम गर्नेहरुलाई हराउन जनताहरु लाग्ने दाबी गर्नुभयो । “देशलाई बचाउने बेला आएको छ, अहिलेसम्मकै सबै विकृति र विसंगतीलाई लखेट्ने दिन आउदैछ”, उहाँले भन्नुभयो, “ आसुरहरुलाई नाश गरेर दुर्गाले नयाँ दुनियाको रचना गर्नुभयो, यसपाली जनताको जित हुने आशिर्वाद मागेको छु ।”

उहाँले युवा पुस्ताहरुले मौलिक पर्वको महत्व, मनाउने विधिहरुनै भूल्न थालेको तर्क गर्नुभयो । पाण्डे चितवन क्षेत्र नम्बर ३ बाट प्रतिनिधिसभा सदस्य उम्मेदवारी दिने योजनामा हुनुहुन्छ । उहाँ यसअघि २०७० मा दोस्रो संविधानसभा निर्वाचनबाट निर्वाचित भएपछि वनमन्त्री समेत बन्नुभएको थियो ।