चितवन उद्योग संघका अध्यक्ष त्रिलोचन कँडेलको अध्यक्षतामा सम्पन्न अन्तरक्रिया कार्यक्रममा नेपाल राष्ट्र बैंक, बैंक तथा वित्तीय संस्था नियमन विभागका निर्देशक किरण पण्डित प्रमुख स्रोत व्यक्तिको रुपमा रहनुभएको थियो ।

चितवन उद्योग संघका उपाध्यक्ष एवम् औद्योगिक नीति निर्माण समन्वय तथा पाठशाला सञ्चालन विभागका संयोजक युग राज वस्तीले स्वागत मन्तव्य सहित कार्यक्रमको उद्देश्य माथि प्रकाश पार्नुभएको अन्तरक्रिया कार्यक्रममा चालुपूँजी कर्जा सम्बन्धि मार्गदर्शन २०७९ को व्यवस्थाका विषयमा स्रोत व्यक्ति किरण पण्डितले आफ्नो प्रस्तुतिकरण राख्नुभएको थियो ।

उहाँले बैंकले विभिन्न व्यापारिक फर्महरु, उद्योगहरु र अन्य व्यवसायिक संस्थाहरुलाई निजहरुको चालु सम्पत्ती तथा दायित्वहरुको नियमित मूल्यांकन गरेर आवश्यक पर्ने चालु पूँजीकर्जा प्रदान, निजहरुको चालु सम्पत्ती तथा दायित्वहरुको नियमित मूल्यांकन गरेर कर्जा सीमा निर्धारण, व्यवसायिक संस्था तथा सार्वजनिक क्षेत्रको लगानी रहेको व्यवसायलाई आवश्यक पर्ने कोषमा आधारित तथा गैह्र कोषमा आधारित कर्जा सुविधा प्रदान, कोषमा आधारित कर्जा सुविधाहरुमा बैंकले अधिबिकर्ष कर्जा, डिमाण्ड कर्जा, बिल डिस्काउण्ट, गैह्रकोषमा आधारित कर्जा सुविधाहरुमा प्रतितपत्र, बैंक ग्यारेण्टी आदिको बारेमा प्रस्तुतिकरण गर्नुभएको थियो ।

अन्तरक्रिया कार्यक्रममा चितवन उद्योग संघका पूर्व अध्यक्ष तारा प्रसाद पौडेल, उपाध्यक्षहरु सूर्य प्रसाद न्यौपाने, गजेन्द्र अधिकारी, बैंक अफ काठमाण्डौंका कलष्टर प्रमुख दिपक लम्साल, सिद्धार्थ बैंकका बागमती प्रदेश प्रमुख दुर्गाराज पाण्डे, संघका कार्यसमिति सदस्यहरु गोपाल प्रसाद गैरे, पुरुषोत्तम रिजाल, उद्योगीहरु नरेन्द्रराज आचार्य, रमेश कुमार खड्का लगायतले चालू पूँजी कर्जा सम्बन्धि व्यवस्थाका विषयमा जिज्ञासा राख्नुभएको थियो ।

सहभागीहरुबाट आएका जिज्ञासाहरुको स्रोत व्यक्ति पण्डितबाट समाधान समेत गरिएको थियो ।

अन्तरक्रियामा चितवन उद्योग संघ, गभर्निङ काउन्सिलका अध्यक्ष सोमराज मरहठ्ठा, उद्योग वाणिज्य संघ–चितवनका अध्यक्ष चुननारायण श्रेष्ठ, चितवन उद्योग संघका निवर्तमान अध्यक्ष एवम् पूर्व अध्यक्ष मण्डलका अध्यक्ष राजु पौडेल, चितवन चेम्बर अफ कमर्शका प्रतिनिधि सि.ए. विशाल भट्टराईले अन्तरक्रियाले उद्योगी व्यवसायीहरुमा “आर्थिक पुनरुत्थानका लागि चालू पूँजी कर्जा सम्बन्धि अन्यौताका बारेमा प्रष्ट भएको बताउनुभएको थियो ।