भरतपुर/नेपाल प्रहरी शिक्षालयका निर्देशक प्रहरी नायव महानिरीक्षक सन्दिप भण्डारीको प्रमुख आतिथ्यतामा नेपाल प्रहरी शिक्षालय भरतपुरमा सञ्चालन हुने प्रहरी सहायक निरीक्षक आधारभूत तालिम २–१७८ औं समूहको एक कार्यक्रमका बिच उद्घाटन गरिएको छ ।
प्रमुख अतिथि भण्डारीले शिक्षालय प्राङ्गणमा वृक्षारोपण सहित सहभागी प्रशिक्षार्थीहरूलाई तालिम सफलताको शुभकामनासंगै आफ्नो सिर्जनशील तथा ऊर्जावान जीवन नेपाल प्रहरी संगठन मार्फत जनसेवामा समर्पित गर्नुभएकोमा राष्ट्रले सदैब उच्च मूल्याङ्कन गर्ने बताउनुभयो ।
उहाँले त्यसको लागी तयार हुन आधारस्तम्भको रूपमा आधारभूत तालिमले लक्ष्य अनुसारको दक्ष र सीपयुक्त प्रहरी निर्माण गर्ने भएकोले प्रशिक्षणका क्रममा उच्च अनुशासन, कडा मेहनत र लगनशिलताकासाथ प्रशिक्षण कार्यमा सहभागी हुन निर्देशन समेत दिनुभयो । साथै, प्रशिक्षणमैत्री वातावरण निर्माण गरी प्रशिक्षार्थीहरूको रचनात्मक तथा सिर्जनात्मक सहभागितालाई प्रबर्धन गर्दै सम्पूर्ण प्रशिक्षण व्यवस्थापन गर्न प्रशिक्षक वर्गलाई निर्देशन समेत दिनुभएको थियो ।
कार्यक्रममा तालिम संयोजक प्रहरी नायव उपरीक्षक राजन चापागाईले तालिम सम्बन्धि संक्षिप्त जानकारी प्रस्तुत गर्नुभएको थियो । यस तालिममा महिला ५६ जना र पुरूष ३८३ जना गरी कुल ४३९ जनाको सहभागीता रहेको छ ।
