कालिका/कालिका नगरपालिकाको आयोजनामा औद्योगिक क्षेत्र स्थापना तथा शक्तिखोर मझिमटार सुरुङ मार्ग निर्माण सम्बन्धि अन्तरक्रिया कार्यक्रम सम्पन्न भएको छ । कालिका नगरपालिकाका नगरप्रमुख विनोद रेग्मीको अध्यक्षतामा सम्पन्न कार्यक्रममा प्रधानमन्त्री तथा मन्त्री परिषद्को कार्यालयका माननीय राज्यमन्त्री उमेश श्रेष्ठ प्रमुख अतिथि रहनुभएको थियो । प्रमुख अतिथि श्रेष्ठले देशमा औद्योगिक क्षेत्रको निर्माणले देश आत्मनिर्भर बन्ने हुँदा देशमै रोजगारीको सृजना हुने भएकाले उद्योगसँगै औद्योगिक क्षेत्रको स्थापना गर्नुपर्नेमा जोड दिनुभयो ।
त्यस्तै चितवन क्षेत्र नं.२ का साम्सद तथा प्रतिनिधि सभा कानुन न्याय तथा मानव अधिकार समितिका सभापति कृष्णभक्त पोख्रेलले देशको समृद्धिका लागि निर्वाद रुपमा उद्योग कलकारखानाहरुलाई सञ्चालन गर्नं सरकारले छुट्टै नीति बनाउनु पर्ने बताउनु भयो ।
कार्यक्रममा राष्ट्रिय योजना आयोगका उपाध्यक्ष डा. बिश्वनाथ पौडेलले शक्तिखोर औद्योगिक क्षेत्र देशकै मध्य भागमा रहेकोले यसको ठूलो महत्व रहने हुँदा यसलाई छिट्टै सञ्चालनमा ल्याउनु पर्ने बताउनुभयो । उहाँले स्थानियलाई रोजगारीको सृजना गरि औद्योगिक क्षेत्रको बिकास गर्न सके नेपालीहरु बिदेशीने क्रमलाई न्युन गर्न सकिने समेत बताउनुभयो ।
कालिका नगरपालिकाकी उप्रमुख विमला तामाङ्गले स्वागत मन्तव्य राख्नुभएको अन्तरक्रिया कार्यक्रममा चितवन उद्योग संघका अध्यक्ष त्रिलोचन कँडेलले शक्तिखोर औद्योगिक क्षेत्रको हालसम्मको भएका कार्यप्रगतिका बारेमा आफ्ना धारणा राख्नुभएको थियो । त्यस्तै कालिका नगरपालिकाका पूर्व नगरप्रमुख खुमनारायण श्रेष्ठले आफू कालिका नगरपालिकाको नगरप्रमुख हुँदा अगाडि सारिएका योजनाहरुका बारेमा आफ्नो भनाई राख्नुभएको थियो ।
कार्यक्रममा एमालेका नेता देवी ज्ञवाली, चितवन उद्योग संघका पुर्व अध्यक्ष राजु पौडेल, नेकपा एमाले चितवनका अध्यक्ष रामप्रसाद न्यौपाने, चितवन उद्योग संघका कार्यकारी निर्देशक गणेश प्रसाद सिलवाल, उदयपुर सामुदायिक बनका अध्यक्ष केशव लामा, नेपाली काङ्ग्रेसक कालिकाका सभापति दिपेश्वर केसी, माओबादी केन्द्रको नेता सबिता लामा, स्थानियहरु मकरमान श्रेष्ठ, कमल आचार्य, लिलाबहादुर गुरुङ, टिकाराज रिजाल, कृष्ण कुमार श्रेष्ठ, शिवराम केसी लगायतले औद्योगिक क्षेत्र र सुरुङ मार्गको बारेमा आ– आफ्नो भनाई राखेका थिए ।
अन्तरक्रियामा आएका जिज्ञासाहरुलाई कार्यक्रमका प्रमुख अतिथि एवम् अतिथिहरुले प्रष्ट्याउनु भएको थियो । अन्तरक्रिया कार्यक्रममा चितवन उद्योग संघका उपाध्यक्षहरु सूर्य प्रसाद न्यौपाने, मदन घिमिरे, गजेन्द्र अधिकारी, मदन चिरञ्जीवी पोखरेल, कालिका ईकाई समितिका अध्यक्ष चन्द्रकान्त सुवेदी, सञ्चार अधिकृत राजु भट्ट लगायतको उपस्थिति रहेको थियो । कार्यक्रमलाई कालिका नगरपालिकाका सुचना अधिकृत प्रकाशचन्द्र पौडेलले सञ्चालन गर्नुभएको थियो ।
Advertisement
