भरतपुर/भरतपुर विमानस्थल अगाडी रहेका ७ घरटहरा भत्काइएको छ । सडक डिभिजन कार्यालय भरतपुरका निमित्त प्रमुख बाबुराम सापकोटाले पटक–पटक सूचना दिदासमेत घरटहरा नहटाएपछि भत्काइएको बताउनुभयो । पूर्वपश्चिम राजमार्ग अन्र्तगत भरतपुरको गोन्द्राङ–पुलचोक सडक क्षेत्राधिकार परेका संरचनाहरु हटाइएको हो ।

सडक डिभिजनले पछिल्लोपटक यही जेठ ३१ गते सूचना टाँस गर्दै ३ दिनभित्र हटाउन आग्रह गरेको थियो । भरतपुर विमानस्थलको अगाडी सडकको केन्द्रभागबाट २५ मिटरमा परेका ७ घरटहरा हटाइएको छ । उहाँले घरमै सूचना टाँसेर हटाउन भनिएपछि नहटाएपछि बाध्य भएर हटाइएको बताउनुभयो । उहाँले कानुनी प्रक्रियामा जान तयार भएको बताउनुभयो । उहाँले सडक निर्माणको काममा ढिलाई हुन नदिन सडक क्षेत्राधिकारमा परेका संरचना हटाइएको बताउनुभयो ।

सडक, महानगरमा मुअब्जाकाबारे जानकारी लिन जादा टुंगो नलागेपछि मुद्धानै दिएको बताउनुभयो । जग्गाधनी निर्मल ढकालले अदालतको आदेश विपरित घर भत्काइएको बताउनुभयो । “असार २७ गते पेशी थियो, तर पहिल्यै घर भत्काउने काम भयो”, उहाँले भन्नुभयो, “व्यक्तिगत जग्गामा लिखित सूचना विपरित घर भत्काएर उठिबास लगाउने काम भएको छ, हामी न्यायका लागि अदालत जानेछौँ ।”  विमानस्थल अगाडी रहेका एक भाँडा पसल, ६ वटा चियापसलका घरटहरा आज (मंगलबार)  हटाइएको छ । सूर्य गौतम, धर्मराज श्रेष्ठ, अच्युतराज पौडेल, डिलादेवी रिजाल, शिव ढकाल, चिरञ्जिवी गौतमका घरटहरा हटाइएका हुन् ।-कालिका न्युज