खैरहनी/श्री जनजीवन माध्यमिक विद्यालयमा नवनिर्मित सरस्वती मन्दिर एवं मञ्चको एकसाथ उद्घाटन गरिएको छ । सरस्वती पुजा एवं शहीद दिवसको अवसर पारेर उक्त सरस्वती मन्दिर एवम् मञ्चको समुद्घाटन गरिएको हो ।
चितवन उद्योग संघका पूर्व अध्यक्ष एवं खैरहनी–२, चैनपुर निवासी समाजसेवी भीमबहादुर पाण्डे (राजु) एवं उहाँकी धर्मपत्नी कल्पना पाण्डेद्वारा स्व. पिता भुपाल बहादुर पाण्डे एवं स्व. माता नेत्रकुमारी पाण्डेको पुण्यस्मतिमा ८ लाख ९५ हजारको लागतमा निर्मित सरस्वती मन्दिर एवं मञ्चको खैरहनी नगरपालिकाका नगरप्रमुख लालमणि चौधरीबाट समुद्घाटन गरिएको थियो ।
श्री जनजीवन माध्यमिक विद्यालयका व्यवस्थापन समितिका अध्यक्ष रोहिणीप्रसाद उप्रेतीको सभापतित्वमा सम्पन्न कार्यक्रममा प्रमुख अतिथि खैरहनी नगरपालिकाका नगरप्रमुख लालमणि चौधरी, विशिष्ट अतिथि चितवन उद्योग संघका अध्यक्ष राजु पौडेल, अतिथि नेकपा खैरहनीका अध्यक्ष लक्ष्मी ढकाललगायतले शुभकामना व्यक्त गर्नुभएको थियो ।
विद्यालयका सह–प्राचार्य रामहरि खकुरालले सञ्चालन गर्नुभएको कार्यक्रममा विद्यालयका प्राचार्य गोपालप्रसाद शर्माले कार्यक्रमको उद्देश्य सहित स्वागत मन्तव्य राख्नुभएको थियो ।
सरस्वती मन्दिर एवम् मञ्चको समुद्घाटन कार्यक्रममा चितवन उद्योग संघका अध्यक्ष राजु पौडेल, पूर्व अध्यक्ष भीमबहादुर पाण्डे, कार्यकारी निर्देशक गणेशप्रसाद सिलवाल, चितवन उद्योग संघ खैरहनी इकाई समितिका अध्यक्ष एवं कार्यसमिति सदस्य प्रतिभा श्रेष्ठ, कार्यसमिति सदस्यहरु मदन चिरञ्जीवि पोखरेल, गोपालप्रसाद गैरे, पुरुषोत्तम रिजाल, प्रशासकीय अधिकृत गोविन्द प्रसाद पौडेल, सञ्चार अधिकृत राजु भट्टलगायत रत्ननगर र खैरहनी क्षेत्रका उद्योगीहरुको उपस्थिति रहेको थियो ।