भरतपुर /भरतपुर महानगरपालिकाका उप प्रमुख चित्रसेन अधिकारीले स्काउटले मानिसलाई बहुप्रतिभाशाली बनाउने बताउनु भएको छ । स्काउट आफैमा एक सिकाइ हो उप प्रमुख अधिकारीले भन्नू भयो, पर्याप्त ज्ञान आर्जन गर्न कुनै न कुनै माध्यमबाट स्काउटमा जोडिन आबश्यक छ ।

नेपाल स्काउटको ७१ औ स्थापना दिवस तथा स्काउट कल्याण सेवा समाज चितवनको प्रथम साधारणसभा तथा अधिबेशनलाई आज भरतपुरमा सम्बोधन गर्दै उप प्रमुख अधिकारीले स्कुलको सिकाइ र स्काउटको सिकाइमा धेरै भिन्नता रहेको पनि बताउनु भयो । विद्यालयको सिकाइ मात्र पर्याप्त छैन, उनीहरूलाई व्यावहारिक जीवन तथा नैतिकताका कुरा पनि सिकाउनुपर्छ उप प्रमुख अधिकारीले भन्नू भयो । विद्यालयको पढाइसँगै हरेक बालबालिकालाई स्काउटमा प्रशिक्षित गर्नुपर्ने उहाँको धारणा थियोे । स्काउटले बालबालिकाको फरक क्षमता प्रस्फुटन गराउने भन्दै उप प्रमुख अधिकारीले अहिलेका बालबालिकाका लागि स्काउट अपरिहार्य भएको पनि उल्लेख गर्नु भयो । स्काउटले बालबालिकालाई भावनात्मक रूपमा बलियो र शारीरिक रूपमा सक्रिय बनाउन पनि महत्त्वपूर्ण भुमिका खेल्ने उहाँको भनाइ छ । कार्यक्रममा बोल्दै भरतपुर १० का वडा अध्यक्ष परमेस्वर खनालले स्काउटको नितिलाई प्रत्येक घर घरमा पुर्‍याउन जरुरी रहेको बताउनु भयो । खनालले स्काउटले सबैलाई सबल र सक्षम बनाउन सहयोग गर्नेमा पनि बिश्वास व्यक्त गर्नु भयो ।

स्थानीय पालिकामा, पालिका प्रमुख संरक्षक तथा पालिका उपप्रमुख प्रमुख स्काउट हुने व्यवस्था छ । नेपाल स्काउटले सङ्घ, प्रदेश र स्थानीय सरकारको सहयोगमा नीतिगत रुपमै देशका ७ सय ५३ वटै पालिकामा त्यहाँका सबै विद्यालयमा स्काउट संरचना निर्माण गर्ने निर्णय पनि गरेको छ । नेपाल स्काउटले पहिलो राष्ट्रिय स्काउट ज्याम्बोरी विस २०४३ मा कीर्तिपुरमा गरेको थियो । नेपाल स्काउटले दोस्रो ज्याम्बोरी विसं २०६९ मा चितवनको टिकौलीमा गरेको थियो । नेपालमा स्काउटको स्थापना वि‍सं २००९ सालमा भएको हो । नेपालका बालबालिका तथा युवा वर्गलाई स्काउटमा आधिकारिक मात्रामा सहभागी गराई तिनीहरूको शारीरिक, मानसिक र बौद्धिक विकास गरी अनुशासित र स्वावलम्बी बनाई देश विकासमा सहभागी गराउन नेपाल स्काउटको स्थापना भएको हो ।