भरतपुर/“दिगो आर्थिक विकासका लागि औद्योगिक प्रवर्धन” भन्ने नारा सहित चितवन उद्योग संघको आयोजनामा मिति २०७९ सालको पौष १, २ र ३ गते आयोजना गरिने “सातौं चितवन अन्तराष्ट्रिय औद्योगिक प्रदर्शनी” लाई सफल बनाउने उद्देश्यका साथ चितवन उद्योग संघका अध्यक्ष त्रिलोचन कँडेलको नेतृत्वमा सातवटै प्रदेशहरुमा सहयोग प्रस्ताव पेश गरिएको छ ।
प्रस्ताव पेश कार्यक्रम अन्तर्गत पर्यटन, उद्योग, वाणिज्य तथा आपूर्ति मन्त्रालय गण्डकी प्रदेशका माननीय मन्त्री मणि भद्र शर्मा कँडेललाई प्रदर्शनी सहयोग सम्बन्धि प्रस्ताव पेश गरिएको थियो । त्यसैगरी उद्योग वाणिज्य तथा आपूर्ति मन्त्रालय बागमती प्रदेशका माननीय मन्त्री मिलनबाबु श्रेष्ठ, सचिव विश्व बाबु पुडासैनीलाई प्रदर्शनी सहयोग प्रस्ताव पेश गरिएको छ । सोही अवसरमा टोलीले बागमती प्रदेशका मुख्यमन्त्री राजेन्द्र प्रसाद पाण्डे, आन्तरिक मामिला तथा कानून मन्त्रालयका माननीय मन्त्री कृष्ण प्रसाद खनाल, आर्थिक मामिला तथा योजना मन्त्रालयका माननीय मन्त्री शालिकराम जमरकट्टेल, नीति तथा योजना आयोगका उपाध्यक्ष डा.कृष्णराज पन्तसँग छुट्टाछुट्टै भेटघाट समेत गरेको थियो ।
त्यस्तै उद्योग, पर्यटन तथा वन मन्त्रालय मधेश प्रदेशका सचिव विशाल घिमरे, उद्योग, श्रम तथा रोजगार मन्त्रालय प्रदेश नं. १ का माननीय मन्त्री प्रताव प्रकाश हाङगामका स्वकीय सचिव विश्वराज लिम्बुलाई प्रदर्शनी सहयोग सम्बन्धि प्रस्ताव पेश गरिएको थियो ।
त्यसैगरी उद्योग, पर्यटन, वन तथा वातावरण मन्त्रालय सुदुरपश्चिम प्रदेशका उपसचिवलाई सहयोग सम्बन्धि प्रस्ताव पेश गरिएको थियो । सोही अवसरमा टोलीले आर्थिक मामिला मन्त्रालय सुदुरपश्चिम प्रदेशका सचिव जितेन्द्र बस्नेत, धनगढी उपमहानगरपालिकाका प्रमुख गोपाल हमालसँग छुट्टाछुट्टै भेटघाट समेत गरेको थियो । त्यस्तै उद्योग, वाणिज्य तथा आपूर्ति मन्त्रालयका माननीय मन्त्री अजय शाही, सचिव हेमराज सुवेदीलाई सहयोग सम्बन्धि प्रस्ताव पेश गरिएको थियो ।
त्यसैगरी उद्योग, पर्यटन, वन तथा वातावरण मन्त्रालय कर्णाली प्रदेशका सचिव मोहनदेव जोशीलाई सहयोग सम्बन्धि प्रस्ताव पेश गरिएको थियो ।
सोही अवसरमा टोलीले कर्णाली प्रदेशका माननीय मुख्यमन्त्री जीवनबहादुर शाही, प्रमुख सचिव राज कुमार श्रेष्ठ, सचिव आनन्द सारु, आर्थिक मामिला तथा योजना मन्त्रालय कर्णाली प्रदेशका माननीय मन्त्री विन्दमान विष्ट, सचिव झक्काप्रसाद आचार्य, आन्तरिक मामिला तथा कानून मन्त्रालय कर्णाली प्रदेशका माननीय मन्त्री हिमबहादुर शाही, सचिव दिनेश सागर भुषाल, सामाजिक विकास मन्त्रालयका माननीय मन्त्री यज्ञ बहादुर बुढा क्षेत्री, सचिव कृष्ण प्रसाद काप्री, भूमि व्यवस्था, कृषि तथा सहकारी मन्त्रालय कर्णाली प्रदेशका माननीय मन्त्री चन्द्र बहादुर शाही, भौतिक पूर्वाधार तथा शहरी विकास मन्त्रालय कर्णाली प्रदेशका माननीय मन्त्री पदम बहादुर रोकाया, सचिव प्रेमदत्त भट्ट, उद्योग तथा उपभोक्ता हित संरक्षण निर्देशनालय कर्णाली प्रदेशका निर्देशक मुकुकन्दनाथ योगीलाई छुट्टाछुट्टै भेटघाट गरिएको थियो ।
सातै प्रदेशहरुमा पुगी प्रदर्शनीका लागि सहयोग प्रस्ताव पेश गरिएको थियो । उक्त प्रस्ताव पेश गरिएका मन्त्रालयका प्रमुख एवम् प्रतिनिधिहरुले प्रस्ताव बमोजिम सहयोग गर्ने र आ–आफ्ना प्रदेशका विशेषता झल्कने गरि प्रदेश विशेष पेभिलोनमा उद्योगीहरुलाई स्टल राख्न सहयोग गर्ने प्रतिवद्धता समेत व्यक्त गर्नुभएको थियो । उहाँहरुले भेटका क्रममा बजेट निर्माणको चरणमा नै प्रस्ताव पेश भएको र स्वदेशी उद्योगको प्रवर्धनका लागि प्रदर्शनी अति महत्वपूर्ण हुने भएकोले पनि पूर्ण रुपमा सहयोग रहने बताउनु भयो ।
