जुगेडी/भरतपुर महानगरपालिका वडा नं. २९ मा रहेको इन्द्रेणी सामुदायिक वन उपभोक्ता समूहको हाताभित्र रहेको खैरहनी चौरमा अभ्यास मनसुन–२ को प्रदर्शन कार्यक्रम सम्पन्न भएको छ । अभ्यास तालिम कार्यक्रममा नेपाली सेनाको काली बहादुर गण, श्री नं.२ विपद् व्यवस्थापन गण, सशस्त्र प्रहरी बल नं. १७ गण, जिल्ला प्रहरी कार्यालय चितवन, नेपाल रेडक्रस सोसाइटी, नेपाल स्काउट, चितवन जिल्लाको विभिन्न स्कुलहरुमा अध्ययनरत राष्ट्रिय सेवा दलमा तालिम गरेका भाईबहिनीहरुको प्रत्यक्ष सहभागितामा रहेको थियो ।
कार्यक्रममा विपद्को पूर्व तयारी जस अन्तर्गत सहज खबर संकलन र फौजको तयारी, विपद्को पूर्व सन्ध्यामा प्रशासन, सुरक्षा निकाय साथै अन्यहरुको भूमिका, सुरक्षित स्थानको छनौट र प्रभावित हुन सक्ने इलाकाबाट स्थानीयहरुलाई सुरक्षित स्थानतर्फ स्थानन्तरण, नदीले कटान गरी वस्ती प्रवेश गरेपछि स्थानीयहरुको सुरक्षा निकाय तथा अन्य सरोकारवाला निकायहरुको टिमद्वारा उद्धार, डुवानमा परेका व्यक्तिहरुको उद्धार एवम् प्राथमिक उपचार, बाढीको अवस्थामा बिजुलीको पोल ढल्न गई स्थानीयको घरमा आगो लागे पश्चात आगलागी नियन्त्रण एवम् घाइतेहरुको उद्धार लगायतका विषयहरुमा प्रदर्शन गरिएको थियो ।
कार्यक्रममा काली बहादुर गण भरतपुर, श्री नं.२ विपद् व्यवस्थापन गण, सशस्त्र प्रहरी बल नं. १७ गण, जिल्ला प्रहरी कार्यालय चितवन, नेपाल रेडक्रस सोसाइटी, नेपाल स्काउट लगायतका संघ संस्थाहरुको सहभागितामा विपद्को पूर्व तयारी, त्यसबाट हुन सक्ने सम्भावित दुर्घटना र त्यसका न्यूनिकरण उपायका बारेमा डेमो समेत गरिएको काली बहादुर गण भरतपुर प्रमुख सेनानी अच्युत घिमिरेले जानकारी दिनुभयो।
