राप्ती/राप्ती जेसिजले नव-निर्वाचित जनप्रतिनिधिहरुलाई स्वागत तथा सम्मान गरेको छ । बुधबार खुरखुरे स्थित नन्दनी पार्टी प्यालेसमा एक कार्यक्रमको आयोजना गरि राप्ती नगरपालिकाका नव-निर्वाचित जनप्रतिनिधिहरुलाई स्वागत तथा सम्मान गरेको हो । जेसिजले राप्ती नगरपालिकाबाट निर्वाचित भएका मेयर, उपमेयर तथा वडा अध्यक्षहरुलाई माला तथा फूलका गुच्छाले सम्मान गरेको हो । राप्ती नगरपालिकाका नव- निर्वाचित उप प्रमुख देवेन्द्र लामाको प्रमुख आतिथ्यमा कार्यक्रम सञ्चालन गरिएको थियो । उप प्रमुख लामाले निर्वाचित भएसँगै आफूहरु जनताको सेवक भएको बताए ।

“हामीहरुले पद ग्रहण गर्दैगर्दा भनेका थियौँ कि हामी सेवक हौँ । हामीले अब सेवक बनेर राप्तीलाई विकासतर्फ अगाडि बढाउनेछौँ ।” कार्यक्रममा बोल्दै उनले भनेँ “तुलनात्मक रुपमा राप्तीको पहाडी भेगमा विकास कम भएको छ । त्यस भेगलाई विकासतर्फ अगाडि बढाउनु हाम्रो मुख्य काम हुनेछ ।” वडा र नगरलाई समृद्ध बनाउन युवाशक्ति आवश्यकता भएको उनले बताए । उनले आफू जेसिजको उत्पादन भएको बताए । विधि र शासनलाई बुझ्न उनी राजनितीमा आएको पनि उनले बताएका छन् । कार्यक्रममा राप्ती-२ का वडाध्यक्ष श्यामसुन्दर उप्रेती, राप्ती-७ कि वडाध्यक्ष सुमिता डल्लाकोटी, ईलाका प्रहरी कार्यालयका प्रमुख कुमार गुरुङ, राप्ती जेसिजका सल्लाहकार मार्कण्डेय गौतमले मन्तव्य राखेका थिए । कार्यक्रममा राप्ती जेसिजका निवर्तमान अध्यक्ष दिनेश सेढाईले स्वागत मन्तव्य राखेका थिए । राप्ती जेसिजकी अध्यक्ष बिन्दु सिंजाली मगरको अध्यक्षतामा सम्पन्न कार्यक्रमको सञ्चालन महासचिव अभियान पाठकले गरेका थिए ।