चितवन/चितवनस्थित भरतपुर केन्द्रीय अस्पतालमा भोलिबाट ओपिडी टिकड बिहान ७ बजेदेखिनै खुल्ने भएको छ ।  अस्पतालमा ओपिडी जाँच गर्न आउँने बिरामीको चाप बढ्न थालेपछि भीड व्यवस्थापन गर्न भोलि सोमबारदेखि ओपिडी टिकड काउन्टर बिहान ७ बजेदेखिनै खुल्न लागेको अस्पतालका मेडिकल सुपरिटेन्डेन्ट प्रा. डा.कृष्णप्रसाद पौडेलले जानकारी दिए । यसअघि बिहान ८ बजेदेखि खुल्ने गरेकोमा बिरामीको चापलाई ध्यान दिएर यो व्यवस्था गरिएको उनले बताए ।

त्यस्तै, यसअघि मध्याह्न १२ बजेसम्म खुल्ने गरेकोमा आधा घण्टा थप गरी अब टिकड काउन्टर १२ः ३० बजेसम्म खुल्ने छ । यो सोमबार देखि शुक्रबारसम्म बिदाको दिन बाहेक लागू हुनेछ । अस्पतालले आइतवार सार्वजनिक विदाको दिन पनि निजी अस्पतालको तुलनामा कम शुल्कमा बिहान ९ः३० देखि दिउँसो १ बजेसम्म बिरामीलाई ओपिडी जँचाउने व्यवस्था मिलाएको छ । १५ शैयाबाट शुरु भएको यो अस्पताल वि।स २०६७ सालमा ४१५ शैया हुँदै हाल करिब छ सय शैया भन्दा बढिमा संचालन छ । यस अर्न्तगत हाल नेपाल सरकारको ३ सय शैया र अस्पताल विकास समिति अर्न्तगत ३ सय शैया संचालनमा रहेको छ । वि.स २०५९ सालमा अस्पताल विकास समिति स्थापना भएको थियो ।  नेपालको मध्य भागमा रहेको चितवन जिल्लामा अवस्थित यस अस्पतालमा विशिष्ट एवं अति विशिष्ट सेवाहरू प्रदान गर्ने नेपाल सरकारको यस क्षेत्रकै विश्वासिलो अस्पताल रही आएकोमा छ । नेपाल सरकार मन्त्रिपरिषद्को मिति वि।स २०७५ चैत ३ गतेको निर्णयानुसार यस अस्पताललाई विशिष्ट विशेषज्ञ अस्पतालमा स्तरोन्नती गरी संघीय सरकार अन्तर्गत राखिएको छ। यो अहिले केन्द्रीय अस्पताल बनेको छ ।