भरतपुर/सुमित श्रेष्ठ एक्लैले पाँच गोल गरेपछि पाँचौ स्वर्गीय गणेशबहादुर स्मृति जिल्ला स्तरीय खुल्ला नकआउट फुटबलमा एफसी भरतपुर २९ जुगेडीले सानदार जित हात पारेको छ । सोमबार भएको पहिलो खेलमा जुगेडीले देवचुली ११ नवलपुरलाई ८-१ को फराकिलो अन्तरले पराजित गरेको हो । एकतर्फी खेलमा जुगेडीलाई जिताउन सुमितले पाँच गोलसँगै रन्जन पुनले २ तथा लक्ष्मण गुरुङले एक गोल गरे । देवचुलीका दीपिन रानाले एक गोल फर्काए ।
जुगेडीले देवचुलीको पोष्टमा पहिलो हाफमा नै चार गोल गरेको थियो । पहिलो हाफको २३ औं मिनेटमा सुमितले गोल गर्दै जुगेडीलाई सुरुवाती अग्रता दिलाए । २८ औं मिनेटमा रन्जनले जुगेडीको अग्रता दोब्बर बनाए । लगत्तै ३० औं मिनेटमा रन्जनले व्यक्तिगत दोस्रो गोल गरेपछि जुगेडीले ३-० को अग्रता लियो । ३३ औं मिनेटमा सुमितले व्यक्तिगत दोस्रो गोल गरेपछि पहिलो हाफमा जुगेडीले ४-० को अग्रता लियो ।
दोस्रो हाफमा जुगेडीले चार गोल थप्यो । दोस्रो हाफको १५ औं मिनेटमा सुमितले ह्याट्रिक पुरा गरे । २० औं मिनेटमा उनले व्यक्तिगत चौथो गोल गरेपछि जुगेडीले ६-० को अग्रता लियो । २७ औं मिनेटमा लक्ष्मणले गोल गर्दै जुगेडीलाई फराकिलो जिततर्फ डोहोर्याए । २९ औं मिनेटमा दीपिनले देवचुलीका लागि एक गोल फर्काए । ३० औं मिनेटमा सुमितले व्यक्तिगत पाँचौ गोल गरेपछि जुगेडी ८-१ ले विजयी भयो । सुमित नै म्यान अफ दि म्याच भए ।
यस्तै नारायणी मोटर्स युनिक क्लब बसेनी ‘बी’ र नयाँ बस्ती फुटबल ट्रेनिङ सेन्टरबीचको आजको दोस्रो खेल भने वर्षाका कारण स्थगित भएको छ । पहिलो हाफ सकिएको अवस्थामा हावाहुरीसहितको भीषण वर्षाका कारण खेल स्थगित गरिएको आयोजक युनिक क्लबका अध्यक्ष दीपक गुरुङले जानकारी दिए ।
पहिलो हाफसम्म दुबै टोली गोलरहित बराबारीको अवस्थामा थिए । बाँकी रहेको दोस्रो हाफको खेल मंगलबार दिउँसो १ बजे खेलाइने उनले बताए । सोमबार नै अन्य दुई खेल पनि हुनेछ । सोमबार दिउँसो २ बजे एफसी नौरङ्गे र युनिक क्लब ‘ए’ तथा दिउँसो ४ बजे नारायणी एफसी र एफसी भरतपुर ९ भिड्नेछन् ।
युनिक क्लब बसेनीको आयोजनामा भरतपुर ११ कैलाश टोलमा जारी प्रतियोगिताको विजेताले एक लाख २० हजार तथा उपविजेताले ६० हजार प्राप्त गर्नेछन् । सर्वोकृष्ट खेलाडीले पाँच हजार तथा उत्कृष्ट गोलरक्षक, डिफेन्स, स्ट्राईकर, उच्च गोलकर्ता तथा उदयमान खेलाडीले नगद तीन-तीन हजार प्राप्त गर्नेछन् । प्रतियोगिताको फाइनल २४ गते हुनेछ ।
