रत्ननगर । पूर्वी चितवनको रत्ननगरमा एमालेका उमेदवारहरु मत माग्दै जनताको घरदैलोमा पुगेका छन् । वैशाख ३० गते हुन लागेको स्थानीय तहको निर्वाचनका लागि मत माग्दै उमेदवारहरु घरदैलोमा पुगेका हुन् ।
घरदैलोका क्रममा ज्येष्ठ नागरिक मतदाताहरुले वृद्ध भत्ता दिने एमाले र एमालेका उमेदवारलाई जीतको शुभकामना दिए । उनीहरुले एमाले उमेदवारको जीत सुनिश्चित भएको भन्दै आर्शिवाद समेत दिए । ‘हामीलाई बुढेसकालमा पेट पाल्न भत्ताको व्यवस्था गर्ने एमालेलाई आर्शिवाद छ’, एक बृद्धाले भनिन् ।

मेयर पदकी उमेदवार विमला दुवाडी, उपमेयर पदका उमेदवार यादव प्रसाद पाठक, रत्ननगर ९ को वडाध्यक्ष पदका उम्मेदवार घपन बहादुर लामालगायत वडा सदस्यका उमेदवारहरु आज घरदैलो कार्यक्रममा छन् । कृष्ण मन्दिर चोकमा आयोजित कोणसभामा बोल्दै दुवाडी र पाठकले रत्ननगरलाई विकासको उचाईमा पु¥याउन, रोजगारी सृजना गर्न, ग्रामिण क्षेत्रमा पर्यटन विकास गर्न र सुकुमबासीलाई लालपुर्जाको सुनिश्चित गर्न उमेदवारी दिएको बताए ।
पछिल्लो पाँच वर्षको अवधिमा रत्ननगरमा ठूला योजना निर्माणको प्रक्रिया सुरु गरिएको भन्दै दुवाडीले नगरलाई आवश्यक पर्ने गौरवका योजना निर्माण गरि रत्ननगरको शहरीकरणलाई अन्र्तराष्ट्रिय स्तरको वनाउने प्रतिवद्धता व्यक्त गरिन् । उपमेयरका उमेदवार पाठकले एमालेको नेतृत्वबाट मात्रै सवृद्धि सम्भव रहेको भन्दै यसअघि एमालेले सुरुवात गरेको योजनालाई सम्पन्न गरेर छाड्ने बताए ।
एमालेले घरदैलो सम्पूर्ण शक्ति परिचालन गरेको छ । गठबन्धन दलमा असन्तुष्टि कायम रहेकै बेला एमाले भने एकढिक्का बनेर अगाडि बढेको छ । रत्ननगर उमेदवारले मनोनयन दर्ता गरेपछि चार वटा वडामा घरदैलो गरेर सकेका छन् ।
पूर्वी चितवनकै कालिका नगरपालिकामा पनि एमालेले घरदैलो कार्यक्रमलाई तीव्र बनाएको छ । कालिकामा मेयरका उमेदवार विनोद रेग्मी र उपमेयरकी उमेदवार विमला लामाले आज वडा नं १ मा घरदैलो गर्दै छन् । वडा नं १ को अध्यक्षमा बुद्धि बोम्जनले उमेदवारी दिएका छन् ।
पूर्वी चितवनको चार वटै पालिकालाई एमालेको गढका रुपमा लिइन्छ । २०७४ सालको निर्वाचनमा एमालेले चार वटै पालिकामा जितेको थियो । यसपटक पाँच दलिय गठबन्धनसँग एमाले एक्लै भिड्दै छ ।