माडी/चितवनको माडी नगरपालिकामा एमालेका तर्फबाट उपप्रमुखमा उम्मेदवारी दर्ता गराएका रेशमलाल आचार्यले उम्मेदवारी फिर्ता लिनुभएको छ । माडीमा एमाले र राप्रपाबीच चुनावी तालमेल गर्ने सहमति अनुसार आचार्यले उम्मेदवारी फिर्ता लिनुभएको हो । दुवै पार्टीले माडीमा एक कार्यक्रमको आयोजना गरी तालमेलको सहमति अनुसार आचार्यले उम्मेदवारी फिर्ता लिनुभएको हो । उहाँले निर्वाचन अधिकृतको कार्यालयमा पुगेर आधिकारिक रुपमा वैशाख १६ गते उम्मेदवारी फिर्ता लिने बताउनुभएको छ ।
वैशाख १२ गते उम्मेदवारी दर्ताको दिन दुई पार्टीबीच अन्तिम समयमा तालमेल भएकोले आचार्यले एमालेका तर्फबाट उपप्रमुखमा उम्मेदवारी दिनुभएको थियो । उम्मेदवारी फिर्ता कार्यक्रममा बोल्दै उपप्रमुखका उम्मेदवार आचार्यले पार्टीको एक असल कार्यकर्ता भएको नाताले तालमेलको भावना अनुसार उम्मेदवारी फिर्ता लिएर पार्टीलाई सहयोग गर्ने बताउनुभयो । उहाँले उम्मेदवारी फिर्ता लिएर गठबन्धनका उम्मेदवारलाई जिताउन लागिपर्ने बताउनुभयो ।
राप्रपाका तर्फबाट उपप्रमुखमा मदन पौडेलले उम्मेदवारी दिनुभएको छ । सो कार्यक्रममा बोल्दै उपप्रमुख उम्मेदवार पौडेलले गठबन्धनका उम्मेदवारलाई जिताउन प्रतिबद्ध भएर लाग्ने बताउनुभयो । सो कार्यक्रममा एमाले क्षेत्र नं. ३ का अध्यक्ष श्याम विष्ट, प्रदेश कमिटी सदस्य सरस्वती विष्ट, एमाले प्रचार विभाग प्रमुख रविकिरण पौडेल, माडी नगर अध्यक्ष नारायण अधिकारी, सचिव श्रीप्रसाद दवाडी, माडी नगरपालिकाको प्रमुखका उम्मेदवार ताराकुमारी काजी महतो, राप्रपाका जिल्ला प्रवक्ता राजु भण्डारी लगायतको उपस्थिति थियोे ।