रत्ननगर/ चितवनको रत्ननगर नगरपालीका वडा नम्वर १५ मा अवस्थित दिग्दर्शन बचत तथा ऋण सहकारी संस्थाको आयोजनामा बुधबार खुल्ला रक्तदान कार्यक्रम सम्पन्न भएको छ। संस्थाको ८ औँ स्थापना दिवसको अवसरमा आयोजित उक्त कार्यक्रममा रत्ननगर नगरपालिका वडा नम्वर १५ का वडाध्यक्ष हुमनाथ लामिछानेको प्रमुख आतिथ्यता रहेको थियो। सो कार्यक्रममा रत्ननगर १५ का वडा सचिव रुप बहादुर पण्डित क्षेत्री विशिष्ट अतिथिको रुपमा रहेका थिए।

त्यस्तै, पिठुवा खानेपानी तथा सरसफाई उपभोक्ता संस्था,रत्ननगरका अध्यक्ष आशिक तामाङ्ग,दिग्दर्शन खानेपानी तथा सरसाफाई उपभोक्ता संस्थाका अध्यक्ष भोजराज लामिछाने , दिग्दर्शन टोल बिकास समितिका अध्यक्ष मोतिलाल भट्टराई,रत्ननगर नगरपालिका वडा नम्वर १५ का १६ वटै टोलका अध्यक्षहरु लगायतको उपस्तिथि रहेको थियो।

कार्यक्रममा बोल्दै प्रमुख अतिथी लामिछानेले रगतको बढ्दो अभावमा संस्थाले यस्ता किसिमको कार्यक्रम गरेकोमा खुशी व्यक्त गरे। रगतको अभावमा कोहि कसैले अकालमा ज्यान गुमाउन नपरोस भनी उक्त कार्यक्रमको आयोजना गरिएको संस्थाका कार्यक्रम संयोजक भोजराज लामिछानेले जानकारी दिनुभयो। संस्थाले यस अघि पनि थुप्रै पटक रक्तदान लगायत अन्य सृजनात्मक कार्यहरु गर्दै आएको उनले बताए।

सो कार्यक्रममा ३९ जना रक्तदाताले रक्तदान गरेका थिए। उक्त कार्यक्रम संस्थाका अध्यक्ष दण्डपानी लामिछानेको सभापतित्वमा सम्पन्न भएको थियो। कार्यक्रम संस्थाका सचिव जनजिवन ढकालले संचालन गरेका थिए। त्यस्तै,सोही दिन साँझ संस्थाको आफ्नै परिसर अगाडि दिप प्रज्जवलन गरि ८ औँ स्थापना दिवस मनाईएको छ। कार्यक्रममा प्रमुख अतिथि रुप बहादुर पण्डित क्षेत्रीले द्विप प्रज्जवलन गर्नुका साथै कर्मचारी एवं पदाधिकारीहरुले केक काटेर खुशियाली मनाईएका थिए। सोही कार्यक्रममा संस्थाको भित्तेपात्रो बिमोचन गर्नुका साथै उपस्थित सम्पुर्णलाई वितरण समेत गरिएको थियो।