भरतपुर/आदिकवि भानुभक्त माध्यमिक विद्यालयबाट २०५६ सालमा एसएलसी दिने विद्यार्थीहरुको पुर्नमिलन एवम् भेटघाट कार्यक्रम सम्पन्न भएको छ ।
केही हप्ता अगाडि देखि सामाजिक सञ्जालको म्यासेन्जर गु्रपबाट आदिकवि भानु माविबाट २०५६ सालमा एसएलसी दिने विद्यार्थीहरुको जनसम्पर्क शुरु भएको थियो । उक्त गु्रपमा छलफल गरी चितवन आसपास छरिएर रहेका विद्यार्थीहरुले भेलाको आयोजना गर्ने योजना बनाए अनुरुप विद्यालय प्राङ्गणमा आज शनिबार एक कार्यक्रमको आयोजना गरी विद्यार्थीहरुबीच पुर्नमिलन एवम् भेटघाट कार्यक्रम सम्पन्न गरिएको छ ।

२०५६ सालमा भानु माविबाट एसएलसी दिने करीब ६५ जना विद्यार्थीहरु मध्ये कोही कामको सिलसिलामा देश बाहिर रहनुभएको, कोही नेपालकै अन्य जिल्लाहरुमा रहनु भएको हुँदा आजको भेलामा चितवन आसपास रही विभिन्न पेशा, रोजगारीमा आवद्धता भएकाहरु मध्ये २० जनाको उपस्थिति रहेको थियो ।
राजु भट्टले कार्यक्रमको उद्देश्य माथि प्रकाश पार्नुभएको भेलामा सहभागी साथीहरुले आफ्नो परिचयसँग स्कूल पढ्दादेखि हालसम्मको आ–आफ्ना अनुभवहरु सुनाउनु भएको थियो ।

पुर्नमिलन एवम् भेटघाट कार्यक्रममा सुनिता श्रेष्ठ, कृष्ण प्रसाद आचार्य, ठाकुर प्रसाद न्यौपाने, सुरेन्द्र लामिछाने, सचिन श्रेष्ठ, सुरेश लामिछाने, लक्ष्मण श्रेष्ठ, अमृत ह्योजु, देशराज काफ्ले, रमेश श्रेष्ठ, विकास श्रेष्ठ, भिमबहादुर राई, रोशन भट्ट, सुजन अंगाई, भुवन श्रेष्ठ, नारायण दुवाडी, उर्मिला श्रेष्ठ, प्रतिमा भट्टराई, दिनेश रेग्मी लगायतको उपस्थिति रहेको थियो ।
सहभागीहरुले पुर्नमिलन एवम् भेटघाट कार्यक्रमले आफूहरुलाई पुराना दिनको याद दिलाएको, साथीहरुबीच सम्बन्ध स्थापित भएको र स्कूल पढ्दाको यादहरुले आफूलाई निकै रोमान्चित बनाएको बताएका थिए । कार्यक्रममा साथीहरुको भेटघाटलाई अगाडि बढाउँदै लैजाने, छिटो भन्दा छिटो पिकनिक कार्यक्रमको आयोजना गरी अन्य साथीहरुलाई गु्रपमा आवद्धता गराउने लगायतका विषयमा छलफल गरिएको थियो ।