काठमाण्डौं/चितवन उद्योग संघका अध्यक्ष भेषराज दुवाडीको नेतृत्वमा काठमाण्डौं पुगेको उद्योगी, व्यवसायीहरुको टोलीले पूर्वप्रधानमन्त्री एवं नेकपाका अध्यक्ष पुष्पकमल दाहाल (प्रचण्ड)सँग उहाँकै निवास खुमलटारमा विशेष भेटघाट गरेको हो ।
भेटघाटका क्रममा प्रदेश नं. ३ अन्तर्गत चितवनमा बन्दै गरेको चितवन प्रर्दशनी केन्द्रको निर्माण प्रक्रिया, निर्माण पछिको सञ्चालन विधि र चितवन उद्योग संघले अघि सारेका परियोजनाहरुका बारेमा छलफल गरिएको थियो । छलफलका क्रममा पूर्वप्रधानमन्त्री दाहालले चितवन प्रदर्शनी केन्द्रका बारेमा आफू सकारात्मक रहेको र आफ्नो तर्फबाट सक्दो सहयोग गर्न तयार रहेको समेत बताउनुभयो ।
छलफल अघि उद्योग, वाणिज्य तथा आपूर्ति मन्त्री लेखराज भट्टसँग समेत उद्योगी व्यवसायीहरुले विशेष भेटघाट गरेका थिए । छलफलका क्रममा नेपाल उद्योग परिसंघका उपाध्यक्ष एवं चितवन उद्योग संघका पूर्व अध्यक्ष कृष्णप्रसाद अधिकारी, चितवन उद्योग संघका बरिष्ठ उपाध्यक्ष राजु पौडेल, उपाध्यक्ष त्रिलोचन कँडेल, कार्यकारी निर्देशक गणेश प्रसाद सिलवाल, कार्यसमिति सदस्य मदन चिरञ्जीवी पोखरेल, गोपाल प्रसाद गैरे, प्रशासकीय अधिकृत गोविन्द प्रसाद पौडेल, सञ्चार अधिकृत राजु भट्टलगायतको उपस्थिति रहेको थियो ।
