भरतपुर/जस्तोसुकै विपतको घडिमा पनि आर्दश नारी साथमै छ भन्ने आभाष दिलाउन आर्दश नारी विकास केन्द्रले अनलाइन मार्फत संस्थाका पदाधिकारी , सदस्य,कर्मचारी र न्याय संवाददाता संग बैठक गर्यो । अप्ठ्यारोमा परेकाहरुलाई तपाई एक्लै हुनुहुन्न भन्ने आभाष दिलाउन र सस्थाले आगामी दिनमा गर्ने कार्यक्रमहरुबारे छलफल गर्न बैठक गरिएको थियो । संस्थाका अध्यक्ष मीना खरेलले सामाजिक उत्तरदायित्व निर्वाह गर्दै कोरोनाका कारण सबैजना घरभित्रै बस्नुपरेकोले एक्लोपनको महसुस नहोस् भन्नका लागि बैठक गरिएको बताउनुभयो । “हामीले सामाजिक उत्तरदायित्व जति कुशलतापूर्वक निर्वाह गर्नेछौँ, त्यति सहजै हामीले कोरोना भाइरस संक्रमण तथा यसका संभावित सामाजिक, आर्थिक, सांस्कृतिक प्रभावहरु न्यूनीकरण गर्न सक्नेछौँ।” अध्यक्ष खरेलले भन्नुभयो ।

बैठकमा विश्व शान्ती र कोरोना भाइरसलाई परास्त गर्ने शक्ति प्रदान गर्न सकियोस् भन्ने कामना समेत गरिएको थियो । सो अवसरमा आगामी दिनमा संस्थागत गतिविधि कसरी अगाढी बढाउने भन्ने बारेमा समेत छलफल भयो । जसमा कोरोना भाइरसको कारण विश्व आक्रान्त बनिरहेकाले कोरोना संक्रमतिहरुको पुर्ण स्वास्थय लाभको कामना साथै मृत्यु भएकाहरुको आत्माको चीर शान्तीको कामना गर्दै दीप प्रज्वलन गरिने, त्रसित मानसिकतालाई कम गर्न मनोवल उच्च पार्नका लागि र पीडा बाढ्ने वातावरण तयार गर्न जेठ ६ गते साहित्यीक गोष्ठी गरिने भएको छ । यस्तैगरि स्थानीय तहसंग पनि समन्वय र सहकार्य गर्दै भच्चुअल कार्यक्रम गरिने निर्णय गरिएको छ । कार्यक्रममा संस्थाका अध्यक्ष मीना खरेल, उपाध्यक्ष उषा खरेल सुवेदी ,सचिव पृथ्वी सुवेदी, सहसचिव शीशा राई, सदस्यहरु लक्ष्मी गुरुगं, अनिता केसी, संस्थाका कार्यक्रम अधिकृत सरिता पौडेल, लेखा अधिकृत सिर्जना पाण्डे, न्याय संवाददाता लालकृमारी सिलवाल, लक्ष्मी नेपाली, लक्ष्मी तामागं लगायतको सहभागिता रहेको थियो ।

संस्थाले १०१ औं नारी दिवसको अवसर पारेर हरेक हप्ताको शनिवार दिउंसो १ बजेदेखि मानसिक स्वास्थ्य प्रभावितहरुका लागि भर्चुअल माध्यमबाट कार्यक्रम गर्दै आइरहेको छ ।