भरतपुर/करिब ६ फिट अग्लो भिमकाय शरीर, चिल्लो पारेर खौरिएको शिर, अजंगका हात पाखुरा, कुनै चलचित्रको पर्दा बाट सिधै निस्किए जस्तो चाल । शारीरिक सुगठनका बिषयमा केही जान्न, बुझ्न तम्सिने जो कोहिलाई पनि स्वयं गुरु द्रोणाचार्यकै दर्शन पाए जस्तो हुन्छ उहाँलाई भेट्दा । शारीरिक सु–संगठनको चितवनको समाजमा उहाँको इज्जत र प्रतिष्ठा, उहाँको कद जस्तै अग्लो छ –राकेश मान श्रेष्ठको । भिडभाडमा परैबाट चिन्न र भेटन सजिलो छ राकेशजीलाई । हरेक दिन बिहान साँढे चार बजे नै “चितवन फिजिकल फिटनेस सेन्टर प्रा.लि. को भरतपुर शाखामा भेटिनुहुन्छ उहाँ । हरेक बिहान हाँस्दै, हँसाउँदै गरुङ्गा फलाम उचाल्दै दैनिक दुई घण्टा पसिना बगाउँदैमा बित्छ उहाँको बिहानी ।

उमेरले करिब पाँच दशक पार गरि सक्नुभएका श्रेष्ठलाई प्रायः सोधिने प्रश्न हो, यस्तो जोश, जाँगर र र फुर्ति कहाँबाट आउँछ तपाईलाई ? जवाफमा उहाँले छोटो र मिठो शब्दमा भन्ने गर्नुहुन्छ –“जोस र फुर्तिले व्यायाम गरिने हैन, व्यायाम गर्नाले जोश र फुर्ति आउने हो ।” उहाँ भन्नुहुन्छ–“हाम्रो शरीर जस्तो परिस्थिति र वातावरणमा रह्यो, त्यस्तैमा सहज बन्दै जान्छ । बिहान सबेरै व्यायाम गरेर पसिना बगाए पछि दिनभरिनै जाँगरिलो अनुभव हुन्छ, यो अनुभूती संसारमै अन्त कतै छैन । त्यसो त सामाजिक कार्यमा पनि उत्तिकै क्रियाशिल हुनुहन्छ श्रेष्ठ । उहाँ दिनभर प्रायः विभिन्न कार्यक्रम, मिटिङ, बैठक एवं छलफलहरुमा व्यस्त रहनुहुन्छ ।

उहाँको विचारमा कुनैपनि व्यक्तिको सफलता उसको पारिवारिक र सामाजिक जिवनको उचित व्यवस्थापन नै प्रमुख हो । सन्तुलित जीवनयापनका लागि दिनको कम्तिमा एक–दुई घण्टा शारीरिक व्यायाममा खर्चिनै पर्ने उहाँको ठम्याई छ । सुसंगठित र स्वास्थ शरीर नै उत्कृष्ट मानसिक स्वास्थ्यको मुल धने हो भन्ने बुझेर नै आफू शारीरिक सुसंगठनमा दत्तचित्त भएर लागेको उहाँले बताउनुहुन्छ । पछिल्लो समयमा, “जिम” जानेहरुको संख्या बढेको भएपनि, कतिपयले खासै कुरो नबुझि व्यायाम गर्ने उहाँको गुनासो छ । उहाँ भन्नुहुन्छ, सबै भन्दा पहिले त, आफ्नो लक्ष्य निर्धारित हुनुप¥योे । के का लागि र किन “जिम” जाने थाहा हुनुप¥यो । शारीरिक व्यायाम संगै अर्काे महत्वपूर्ण पक्ष हो, खानपिन । खानपिनको व्यबहारमा परिवर्तन नगरी, व्यायाम मात्रैले परिवर्तन सम्भब छैन र अर्काे महत्वपूर्ण पक्ष हो, आराम । यी तिनै पक्षको सन्तुलन बाट मात्रै इच्छित परिणाम हासिल हुनेछ उहाँ थप्नुहुन्छ । उहाँ भन्नुहुन्छ–“शारीरिक व्यायाम गन्तव्य हैन, यात्रा हो ।”

बिगत दुई दशक भन्दा बढि समयदेखि “जिम” आफ्नो समय बिताईसक्नु भएका श्रेष्ठ हाल चितवन फिजिकल फिटनेस सेन्टर प्रा.लि. का प्रमुख सल्लाहकार, उज्यालो टाईम्स अनलाइनका प्रबन्ध निर्देशक लगायत दर्जनौं संघ–संस्थाहरुको महत्वपूर्ण भूमिकाहरुमा हुनुहुन्छ । बिगतमा, आँफुले “जिम” सुरु गर्दाका अभाव र अफ्ठ्यारा राम्रो संग बुझ्नु भएका उहाँले अबको पिँढिलाई त्यस्तो अफ्ठयारो परिस्थिति नआओस भन्ने चाहनुहुन्छ । व्यायाम गर्न नजानेकालाई सम्झाउँदै, सिकाउँदै अझै कालान्तर सम्म चितवनलाई स्वस्थ्य, तन्दुरुस्त र बलियो बनाई राख्न राकेशमान श्रेष्ठबाट सबैले सिक्न जरुरी छ ।