भरतपुर/बोष्टन ईन्टरनेशनल कलेजद्वारा ‘अर्थ वाणिज्य विषयमा लेख लेखन तथा प्रकाशन” सम्बन्धि एक दिने कार्यशाला सम्पन्न गरेको छ। फाल्गुन ३ गते शनिबार बिहानको ९:०० बजेदेखि सुरु भएको कार्यक्रम साँझ ५ बजे समापन भएको थियो।
अर्थ एवम् वाणिज्यका बिषयमा लेख लेखन तथा प्रकाशन गर्ने सिप विद्यार्थीहरुलाई सिकाउने उद्देश्यका साथ आयोजना गरिएको उक्त कार्यक्रममा बोष्टन कलेजका स्नातक र स्नातकोत्तर तहमा अध्ययनरत ४३ जना विद्यार्थीहरु सहभागी भएका थिए। उक्त कार्यशालामा नयाँ पत्रिका राष्ट्रिय दैनिकका आर्थिक ब्युरो प्रमुख जनार्दन बराल र रिपब्लिकाका कपि-ईडिटर अखिलेश त्रिपाठीले स्रोतव्यक्तिका रुपमा तालिम प्रदान गर्नुभएको थियो।
समाचार लेखन कसरी गर्ने, पत्रकारिताका आधारभुत सिद्धान्त के के हुन्, समाचार केलाई भनिन्छ, कसरी समाचार लेखन र प्रकाशन हुने गर्दछ लगायतका विषयमा अखिलेश त्रिपाठीले प्रस्ट पानुभएको थियो। त्यस्तै गरेर कार्यक्रममा अर्थ वाणिज्यका समाचार र लेखहरु कसरी लेखिन्छन्, प्राथमिकताका समाचारहरु के के हुन्, लेखनको लागी सुचना संकलन कसरी गर्ने लगायतका विषयमा जनार्दन बरालले आफ्नो अनुभव साट्नुभएको थियो। कार्यक्रमलाई थप प्रभावकारी बनाउन विद्यार्थीहरुलाई प्रयोगात्मक अभ्यास पनि गराईएको थियो जसमा विद्यार्थीहरुले पहिलो अभ्यासमा एउटा घटनामा आधारित भएर समाचार तयार पारेका थिए भने दोस्रो अभ्यासमा नेपाल राष्ट्र बैंकको आर्थिक प्रतिवेदन विश्लेषण गरेर समाचार तयार पारेका थिए।
कार्यक्रमको अन्त्यमा सहभागीहरुले उक्त कार्यक्रमबाट सिकेका कुराहरु साटासाट गरेका थिए। ‘कार्यक्रम एकदमै प्रभावकारी भएको छ। यसप्रकारका कार्यक्रमहरुले हाम्रो व्यक्तित्व विकासमा टेवा पुग्छ’ कार्यक्रममा सहभागी पवानी पौडेलले प्रतिक्रिया दिनुभयो। बोष्टन कलेजका एमबिए कार्यक्रम निर्देशक ऋषि चापागाँईले कार्यक्रमको उद्देश्यबारे जानकारी दिँदै भन्नुभयो, ‘विद्यार्थीहरुले आर्थिक विषयमा विश्लेषणात्मक लेख एवम् समाचार लेख्न र प्रकाशन गर्न सिकुन भन्ने उद्देश्यले आज हामीले यस कार्यक्रम आयोजना गरेका हौँ।’
