भरतपुर, २८ मंसिर/शक्तिखोर औद्योगिक क्षेत्रको निर्माण सम्बन्धमा रुख कटानी सम्बन्धि आईपरेका समस्या समाधानका सम्बन्धमा नेपाल सरकार वन तथा वातावरण मन्त्रालयका सचिव डा.विश्वनाथ ओली र संघका पूर्व अध्यक्ष सहित पदाधिकारी समिति बीच छलफल कार्यक्रम सम्पन्न भएको छ ।
चितवन उद्योग संघका अध्यक्ष राजु पौडेलको अध्यक्षतामा सम्पन्न छलफलमा नेपाल सरकार वन तथा वातावरण मन्त्रालयका सचिव डा.विश्वनाथ ओली प्रमुख अतिथि रहनुभएको थियो ।
प्रमुख अतिथि सचिव ओलीले शक्तिखोर औद्योगिक क्षेत्रको निर्माण प्रक्रियामा वनसँग सम्बन्धित हरेक समस्याको समाधान गरी यथाशिघ्र निर्माण कार्य अघि बढाउन मन्त्रालयको तर्फबाट पूर्ण सहयोग रहने बताउनुभयो ।
चितवनका प्रमुख जिल्ला अधिकारी नारायण प्रसाद भट्टराई, नेपाल उद्योग परिसंघका उपाध्यक्ष एवं संघका पूर्व अध्यक्ष कृष्णप्रसाद अधिकारी, बागमती प्रदेश उद्योग परिसंघका बरिष्ठ उपाध्यक्ष एवं संघका निवर्तमान अध्यक्ष भेषराज दुवाडी, सहायक प्रमुख जिल्ला अधिकारी रामबहादुर शाही, डिभिजन वन कार्यालय चितवनका प्रमुख पदम नेपाल, संघका पूर्व अध्यक्ष ताराप्रसाद पौडेल, संघका उपाध्यक्षहरु सूर्यप्रसाद न्यौपाने, युग राज वस्ती, कार्यकारी निर्देशक गणेशप्रसाद सिलवाल, प्रशासकीय अधिकृत गोविन्द प्रसाद पौडेल, सञ्चार अधिकृत राजु भट्टलगायतको सहभागिता रहेको थियो ।
छलफल अघि नेपाल सरकार वन तथा वातावरण मन्त्रालयका सचिव डा.विश्वनाथ ओली लगायतको टोलीले चितवन उद्योग संघको परिसरमा रहेको चितवन प्रदर्शनी केन्द्रको स्थलगत अवलोकन समेत गर्नुभएको थियो । अवलोकनको क्रममा ओलीले चितवन प्रदर्शनी केन्द्रको निर्माण अवस्थाको बारेमा जानकारी लिदै राष्ट्रकै गौरवको रुपमा रहेको चितवन प्रदर्शनी केन्द्रको प्रशंसा समेत गर्नुभयो ।
