चितवन/रोटरी क्लब अफ नारायणी मिड टाउनले इच्छाकामना गाउँपालिका, चितवनस्थित गर्दासको राष्ट्रिय माध्यमिक विद्यालय (RCC Village) मा सहयोग तथा सचेतनामूलक कार्यक्रम सम्पन्न गरेको छ।
क्लबले विगत केही वर्षदेखि विद्यालयका आर्थिक तथा सामाजिक रूपमा सहयोग आवश्यक रहेका विद्यार्थीहरूलाई अभिभावकत्व प्रदान गर्दै आएको छ। यसै क्रममा यस वर्ष अभिभावकत्व ग्रहण गरिएका २३ जना विद्यार्थीहरूलाई चाडपर्वको अवसरमा न्यानो कपडा, विद्यालय झोला, जुत्ता, स्टेशनरी सामग्री तथा दशैं विशेष खाद्यान्न सामग्री वितरण गरिएको हो।
त्यसैगरी, विद्यालयमा अध्ययनरत कक्षा ६ देखि १० सम्मका सबै छात्राहरूका लागि महिनावारी स्वच्छता तथा स्वास्थ्यसम्बन्धी सचेतना कार्यक्रम समेत सञ्चालन गरिएको थियो। कार्यक्रममा महिनावारीका क्रममा अपनाउनुपर्ने व्यक्तिगत सरसफाइ, स्वास्थ्य सावधानी तथा स्वस्थ व्यवहारका विषयमा आवश्यक जानकारी प्रदान गरिएको थियो।
रोटरी क्लब अफ नारायणी मिड टाउनले गर्दास माध्यमिक विद्यालयसँग निरन्तर सहकार्य गर्दै आएको छ। यसअघि क्लबले विद्यालयमा पिउने पानी शुद्धीकरण प्लान्ट तथा सिलिङ फ्यान समेत सहयोग गरिसकेको छ। विद्यालय तथा विद्यार्थीहरूको आवश्यकता पहिचान गरी शिक्षा, स्वास्थ्य, सरसफाइ तथा आधारभूत सुविधाको क्षेत्रमा आगामी दिनमा पनि सहयोगलाई निरन्तरता दिने क्लबले जनाएको छ।
विद्यार्थीको आवश्यकतामा प्रत्यक्ष सहयोग पुर्याउनुका साथै स्वास्थ्य तथा स्वच्छतासम्बन्धी सचेतना अभिवृद्धि गर्ने यस कार्यक्रमले समुदायमा सकारात्मक र दीर्घकालीन प्रभाव सिर्जना गर्ने विश्वास क्लबले लिएको छ।
