चितवन/चितवन उद्योग संघको १८औँ कार्यसमितिको वरिष्ठ उपाध्यक्षमा रत्ननगर प्याकेजिङ उद्योगका सञ्चालक रत्ननगर–२, चितवन निवासी गजेन्द्र अधिकारी चयन भएका छन् ।
उद्योग व्यवसाय क्षेत्रमा लामो समयदेखि सक्रिय अधिकारीले संघको वरिष्ठ उपाध्यक्षको जिम्मेवारीसँगै चितवनको औद्योगिक विकास, उद्योगी व्यवसायीका समस्या समाधान तथा लगानीमैत्री वातावरण निर्माणलाई प्राथमिकतामा राखेर काम गर्ने योजना अघि सारेका छन् ।
चितवनमा उद्योग सञ्चालनका क्रममा उद्योगीहरूले भोग्दै आएका नीतिगत, पूर्वाधार, विद्युत्, कर, बैंकिङ, बजार व्यवस्थापन तथा प्रशासनिक समस्याको पहिचान गरी सम्बन्धित सरकारी निकायसँग समन्वय र सहकार्य गर्ने अधिकारीको प्राथमिकता रहेको छ । उद्योगीका साझा समस्या समाधानका लागि निजी क्षेत्र र सरकारबीच प्रभावकारी समन्वय आवश्यक रहेको उनको भनाइ छ ।
अधिकारीले चितवनमा नयाँ उद्योग स्थापनाका लागि आवश्यक वातावरण निर्माण गर्दै स्थानीय तथा बाह्य लगानी आकर्षित गर्ने, सञ्चालनमा रहेका उद्योगको क्षमता विस्तारका लागि सहजीकरण गर्ने तथा साना तथा मझौला उद्योगलाई प्रविधि, वित्तीय पहुँच र बजारसँग जोड्ने योजना बनाएका छन् ।
त्यसैगरी स्थानीय स्रोतसाधन र कच्चा पदार्थमा आधारित उद्योगको प्रवद्र्धन, स्वदेशी उत्पादनको प्रयोग र बजारीकरणमा जोड दिने उनको योजना छ । उद्योग क्षेत्रमा नयाँ पुस्ताको सहभागिता बढाउन उद्यमशीलता विकास, सीपमूलक तालिम तथा उद्योगको आवश्यकताअनुसार जनशक्ति उत्पादन गर्ने कार्यक्रमलाई समेत प्राथमिकतामा राखिने अधिकारीले बताएका छन् ।
चितवनलाई देशकै महत्वपूर्ण औद्योगिक तथा व्यावसायिक केन्द्रका रूपमा विकास गर्न निजी क्षेत्र, स्थानीय तह, प्रदेश सरकार तथा संघीय सरकारबीच सहकार्य आवश्यक रहेको अधिकारीको धारणा छ। औद्योगिक पूर्वाधारको विकास, व्यवस्थित औद्योगिक क्षेत्र निर्माण, लगानी सुरक्षा तथा उद्योगमैत्री नीति निर्माणका लागि संघमार्फत सम्बन्धित निकायमा निरन्तर पहल गर्ने उनले बताएका छन् ।
उद्योगी व्यवसायीबीच आपसी सहकार्य र अनुभव आदानप्रदानलाई संस्थागत गर्दै उद्योग क्षेत्रमा देखिएका समस्या सामूहिक रूपमा समाधान गर्ने वातावरण निर्माणमा पनि आफ्नो भूमिका केन्द्रित हुने अधिकारीको भनाइ छ ।
“उद्योगको विकासबिना समग्र आर्थिक विकास सम्भव हुँदैन। त्यसैले उद्योगीका समस्या समाधानसँगै नयाँ लगानी भित्र्याउने, रोजगारी सिर्जना गर्ने र स्थानीय उत्पादनलाई बजारसँग जोड्ने विषयलाई प्राथमिकतामा राखेर काम गर्नुपर्छ,” अधिकारीले बताएका छन् । चितवन उद्योग संघको नेतृत्वमा नयाँ जिम्मेवारी प्राप्त गरेका अधिकारीले आफ्नो कार्यकाललाई उद्योगीको हित संरक्षणसँगै जिल्लाको औद्योगिक विकास र प्रवद्र्धनमा केन्द्रित गर्ने अपेक्षा गरिएको छ ।