नुवाकोट/रसुवाबाट आएको भीषण बाढीका कारण प्रभावित परिवारलाई सहयोग पुर्याउने उद्देश्यले फेन्सी व्यवसायी महासंघ नेपाल र फेन्सी व्यवसायी संघ चितवनले नुवाकोटमा ५० लाख रुपैयाँभन्दा बढी मूल्य बराबरको राहत सामग्री वितरण गरेका छन्। २०८३ साल भदौ १० गते रसुवामा आएको बाढी तथा विपद्बाट प्रभावित परिवारलाई लक्षित गरी विदुर नगरपालिका–९ मा राहत सामग्री वितरण गरिएको हो। विपद्का कारण दैनिक जीवनयापनमा कठिनाइ भोगिरहेका परिवारको तत्कालीन आवश्यकता सम्बोधन गर्ने उद्देश्यले विभिन्न प्रकारका अत्यावश्यक सामग्री उपलब्ध गराइएको आयोजकले जनाएको छ।
राहत सामग्रीअन्तर्गत लत्ताकपडा, जुत्ता–चप्पल, फेन्सी सामग्री, खाद्यान्न, सेनेटरी प्याड, ग्यास चुलोलगायत दैनिक जीवनमा आवश्यक पर्ने विभिन्न सामग्री वितरण गरिएको थियो।
राहत वितरण कार्यक्रममा फेन्सी व्यवसायी महासंघ नेपालका अध्यक्ष तथा फेन्सी व्यवसायी संघ चितवनका अध्यक्ष रामप्रसाद पौडेलको उपस्थिति रहेको थियो। कार्यक्रममा फेन्सी व्यवसायी संघ चितवनका प्रवक्ता सन्तोष पोखरेल तथा सदस्य विदुर रेग्मीलगायत सहभागी थिए।
विदुर नगरपालिका–९ का वडा अध्यक्ष कमल श्रेष्ठको रोहवरमा राहत सामग्री प्रभावित परिवारलाई हस्तान्तरण गरिएको थियो। राहत सामग्री पीडित समितिका संयोजक सिंगराज लामासहित प्रभावित परिवारको सहभागितामा सामग्री वितरण गरिएको हो। कार्यक्रममा म्यागङ गाउँपालिकाकी उपाध्यक्ष सीता तामाङ तथा विदुर नगरपालिका–९ का खेलकुद विकास समितिका अध्यक्ष विजय तामाङलगायतको पनि उपस्थिति थियो।
राहत वितरण कार्यक्रममा बोल्दै फेन्सी व्यवसायी महासंघ नेपालका अध्यक्ष रामप्रसाद पौडेलले विपद्को समयमा प्रभावित समुदायसँग प्रत्यक्ष रूपमा जोडिएर सहयोग गर्न पाउनु व्यवसायी समुदायका लागि महत्वपूर्ण सामाजिक दायित्व भएको बताउनुभयो। उहाँले राहत अभियानमा सहयोग गर्ने फेन्सी व्यवसायी संघ तथा महासंघमा आबद्ध सम्पूर्ण व्यवसायी, सदस्य तथा सहयोगीप्रति धन्यवाद व्यक्त गर्दै आगामी दिनमा पनि आवश्यकताअनुसार मानवीय सहयोगका कार्यक्रमलाई निरन्तरता दिने प्रतिबद्धता जनाउनुभयो।
त्यस्तै, विदुर नगरपालिका–९ का वडा अध्यक्ष कमल श्रेष्ठले विपद्को समयमा प्रभावित परिवारको पीडामा साथ दिँदै प्रत्यक्ष रूपमा राहत सामग्रीसहित उपस्थित भएकोमा फेन्सी व्यवसायी महासंघ नेपाल र फेन्सी व्यवसायी संघ चितवनप्रति आभार व्यक्त गर्नुभयो।
उहाँले निजी क्षेत्र तथा व्यवसायी समुदायबाट गरिने मानवीय सहयोगले विपद्बाट प्रभावित परिवारको दैनिक जीवन सहज बनाउन महत्वपूर्ण योगदान पुग्ने बताउनुभयो। विपद्का बेला व्यवसायी समुदायको सामाजिक उत्तरदायित्वलाई व्यवहारमै प्रस्तुत गर्दै गरिएको यस राहत वितरणबाट प्रभावित परिवारलाई तत्काल आवश्यक सामग्री प्राप्त भएको आयोजकको भनाइ छ। साथै, यस अभियानले ‘व्यवसायसँगै सामाजिक सेवा’को भावनालाई थप मजबुत बनाएको बताइएको छ। फेन्सी व्यवसायी महासंघ नेपाल र फेन्सी व्यवसायी संघ चितवनले आगामी दिनमा पनि विपद् तथा कठिन परिस्थितिमा प्रभावित समुदायसँग सहकार्य गर्दै मानवीय सहयोगका कार्यक्रमलाई निरन्तरता दिने जनाएको छ।
