भरतपुर/चितवन उद्योग संघको संरक्षकत्वमा चितवन उद्योग संघ, महिला उद्यमी मञ्चको आयोजनामा हरितालिका तीजको अवसर पारेर २०८३ भाद्र १९, २० र २१ गते चितवन प्रदर्शनी केन्द्रमा आयोजना हुने “चौथो तीज विशेष उद्यमशील एक्स्पो तथा व्यापार मेला–२०८३” को नेपाल सरकारका कानून, न्याय तथा संसदीय मामिला मन्त्री माननीय सोविता गौतमबाट उद्घाटन हुने भएको छ ।
तीज मनाउने सन्दर्भमा दर खाने नाममा हुने गरेका विकृति, विसंगति न्यूनिकरण गरी पर्वहरुका माध्यमबाट उद्यमशिलताको विकासमा सघाउ पु¥याउने, स्वदेशमा नै गरिखान्छु भनी लागेका महिला उद्यमीहरुलाई दिगो उद्यमशिलताको लागि मानसिक रुपमा तयार हुन थप हौसला प्रदान गर्ने र पर्वलाई समेत उद्यमशिलतामा जोड्न सकिन्छ भन्ने सन्देश दिनका लागि यस प्रदर्शनी तथा व्यापार मेला सहयोगी हुने विश्वास लिइएको चितवन उद्योग संघका अध्यक्ष मदन घिमिरेले जानकारी दिनुभयो ।
महिला उद्यमीलाई उद्यमशीलतामा प्रोत्साहन गर्ने, स्थानीय तथा स्वदेशी उत्पादनको बजारीकरण र ब्रान्ड प्रवद्र्धन गर्ने, महिला उद्यमीबीच अनुभव, ज्ञान र सीप आदान–प्रदान गर्ने, नयाँ उद्यमीका लागि व्यवसायिक अवसर र नेटवर्किङ सिर्जना गर्ने, महिलालाई स्वरोजगार तथा आत्मनिर्भर बन्न प्रेरित गर्ने, तीज पर्वलाई मनोरञ्जनसँगै उद्यमशीलता र आर्थिक गतिविधिसँग जोड्ने र तीजको किनमेलदेखि उत्सवसम्म एउटै छानामुनी हुने यस मेला पर्व, संस्कृति र उद्यमशिलताको अद्भुत संगमको रुपमा रहने घिमिरेको भनाई छ ।
प्रदर्शनीमा बंगलादेशबाट गार्मेन्ट, छालाजन्य उत्पादनका २० भन्दा बढी स्टलहरुको छुट्टै प्याभिलियन रहनेछ । भने नेपालको स्थानीय हस्तकला, रैथाने उत्पादन, तीज विशेष सामाग्री, कपडा, जुत्ता–चप्पल, बुटिक, गरगहना (ज्वेलरी), गिफ्ट आइटम, खाद्य परिकार, मेहन्दी, सौन्दर्य सामाग्री, बैक तथा वित्तीय संस्थाहरु, इन्सुरेन्स कम्पनी, कृषिजन्य उत्पादन तथा विभिन्न परिकारका खानाका स्टलहरु र नवप्रवर्तन सम्बन्धी कुल १०० भन्दा बढी स्टलहरू रहने चितवन उद्योग संघ, महिला उद्यमी मञ्चकी अध्यक्ष सरिता खनाल पौडेलले जानकारी गराउनु भयो ।
प्रदर्शनीको माध्यमबाट नेपाली उत्पादनलाई छिमेकी राष्ट्रको बजारमा प्रवद्र्धन गर्ने, उद्यमी तथा व्यवसायीबीच व्यापारिक साझेदारी र बिटुबि सम्बन्ध विस्तार गर्ने, नयाँ लगानी, प्रविधि र व्यवसायिक सहकार्यका अवसर, नेपाली मौलिक उत्पादन, हस्तकला, कृषि तथा औद्योगिक वस्तुको निर्यात प्रवद्र्धनका साथै दीर्घकालीन रूपमा नेपाल र बंगलादेशबीच व्यापारिक सम्बन्ध र आर्थिक सहकार्य थप मजबुत बनाउने अपेक्षा समेत लिईएको पौडेलले बताउनुभयो ।
तीजलाई खर्चिलो तथा मनोरञ्जनात्मक पर्वका रूपमा नभई हाम्रा धार्मिक पर्व र संस्कृतिको संरक्षण गर्दै महिला सिर्जनशीलता, उत्पादन, स्वरोजगार र आर्थिक सशक्तीकरणको अवसरका रूपमा लिइएको एक्स्पोको पहिलो दिन कृष्ण भजन प्रतियोगिता, दोश्रो दिन ‘उद्यमशीलता र रोजगार, प्रवद्र्धनमा स्थानीय सरकार’ विषयक तीज गीत प्रतियोगिता आयोजना हुँदैछ । दुबै प्रतियोगितामा प्रथम हुने समूहलाई रु२५,०००।–, द्धितीय हुने समूहलाई २०,०००।– र तृतीय हुने समूहलाई १५,०००।– र सान्त्वनालाई रु ७,०००।– नगद पुरस्कार व्यवस्था गरिएको छ ।
निःशुल्क प्रवेशको व्यवस्था गरिएको एक्स्पोमा २० हजार भन्दा बढी व्यक्तिले अवलोकन गर्ने र करीब १ करोडको कारोबार हुने अनुमान गरिएको छ । एक्स्पोमा प्रदर्शकको रुपमा सहभागी हुन चाहने व्यक्ति वा संघ–संस्थाले आफ्नो उत्पादन तथा सेवाको स्टल राख्न सक्नेछन् भने एक्स्पोमा प्रायोजक, सह–प्रायोजकको रुपमा इच्छुक विभिन्न उद्योग प्रतिष्ठानले समेत सहकार्य गर्न सक्नेछन् ।
प्रदर्शनी तथा व्यापार मेलामा बंगलादेश–नेपाल चेम्बर अफ कमर्श एण्ड इण्डष्ट्रिजको सहकार्य रहेको छ । भने, मेलाको प्रायोजकमा बोटलर्स नेपाल (तराई) लि., फूड एण्ड स्न्याक्स् पार्टनरमा रिजाल फूड एण्ड वेभरेजेज प्रा.लि., बैकिङ्ग पार्टनरमा सानिमा बैंक रहेका छन् । त्यस्तै मेलाको प्रबद्र्धकको रुपमा नेपाल उद्योग परिसंघ महिला नेतृत्व फोरम, नेपाल घरेलु तथा साना उद्योग महासंघ महिला उद्यमी समिति, भरतपुर महानगरपालिका, उद्योग, वाणिज्य तथा पर्यटन कार्यालय चितवन, चितवनका सम्पूर्ण स्थानीय पालिकाहरु र भरतपुर महानगरपालिकाभित्रका वडाहरुको समेत प्रबद्र्धन सहयोगमा स्टलहरु रहनेछन् ।
वि.सं.२०८० सालदेखि शुरु भएको यस एस्क्पो चौथो श्रृंखलासम्म आईपुग्दा यो वर्ष विदेशी स्टलहरुको सहभागिता सहित अन्तर्राष्ट्रियस्तरको हुँदै जानुले महिला उद्यमीहरुलाई थप हौसला प्रदान गरेको आयोजकको दावी छ ।