थाइल्याण्ड/नेपाल र थाइल्याण्डबीचको मैत्री, संस्कृति, पर्यटन तथा व्यवसायिक सहकार्यलाई सुदृढ बनाउने उद्देश्यले आयोजित नेपाल–थाइल्याण्ड फ्रेन्डशिप फेस्टिभल २०२६ तथा एशिया ग्लोबल एक्सिलेन्स अवार्ड्स २०२६ पाटायास्थित सियामिज होटलमा भव्य रूपमा सम्पन्न भएको छ।
हिमालयन कम्युनिटी प्रोजेक्ट र वर्ल्डवाइड प्रोडक्सन मिडियाको आयोजनामा सम्पन्न कार्यक्रममा नेपाल, थाइल्याण्डसहित विभिन्न देशका नेपाली समुदायका प्रतिनिधि, व्यवसायी, सामाजिक अभियन्ता, बुद्धिजीवी तथा विभिन्न क्षेत्रमा योगदान पुर्याएका व्यक्तित्वहरूको उल्लेखनीय सहभागिता रहेको थियो।
कार्यक्रमका विशेष अतिथि जेनजी प्रतिनिधि तथा राष्ट्रिय स्वतन्त्र पार्टी (रास्वपा) का केन्द्रीय महाधिवेशन प्रतिनिधि हेम बहादुर ढुङ्गेल ले नेपाल र थाइल्याण्डबीच सरकार–सरकार (G2G) स्तरमा कृषि, पर्यटन र संस्कृतिका क्षेत्रमा ठोस सहकार्य आवश्यक रहेको बताउनुभयो।
उहाँले नेपाल र थाइल्याण्ड दुवै देश प्राकृतिक तथा सांस्कृतिक विविधताले सम्पन्न रहेको उल्लेख गर्दै यी सम्भावनालाई आर्थिक समृद्धिसँग जोड्न सके दुवै देशका नागरिकले प्रत्यक्ष लाभ लिन सक्ने धारणा राख्नुभयो।
“नेपाल र थाइल्याण्ड दुवै देशको आफ्नै भौगोलिक विविधता र सांस्कृतिक पहिचान छ। यो पहिचानलाई आर्थिक समृद्धिसँग जोड्न सकियो भने दुवै देशका जनताले प्रत्यक्ष लाभ लिन सक्छन्,” ढुङ्गेलले भन्नुभयो।
कार्यक्रममा विभिन्न क्षेत्रमा उत्कृष्ट योगदान पुर्याउने व्यक्तित्वहरूलाई प्रतिष्ठित सम्मान तथा अवार्ड प्रदान गरिएको थियो। साथै नेपालको कला, संस्कृति, पर्यटन, पाककला र उद्यमशीलतालाई अन्तर्राष्ट्रिय स्तरमा प्रवर्द्धन गर्ने अवसरका रूपमा महोत्सव सफल भएको आयोजकले जनाएको छ।
आयोजकका अनुसार थाइल्याण्डबाट सुरु गरिएको यो अभियान आगामी दिनमा नेपाल–थाइल्याण्डबीच पर्यटन, व्यापार, शिक्षा, संस्कृति तथा सामाजिक सहकार्यलाई थप विस्तार गर्ने लक्ष्यसहित अघि बढाइनेछ।
