राप्ती/चितवन उद्योग संघ, राप्ती कार्यसमितिको आठौँ वार्षिक साधारणसभा पूर्वी चितवनको पर्यटकीयस्थल परेवाकोटमा सम्पन्न भएको छ। उद्योगी–व्यवसायीबीच आपसी समन्वय र सहकार्य अभिवृद्धि गर्दै स्थानीय उद्योग तथा व्यवसायको प्रवर्द्धनमा जोड दिने उद्देश्यसहित साधारणसभा आयोजना गरिएको हो।
चितवन उद्योग संघ राप्ती कार्यसमितिका अध्यक्ष खिलप्रसाद घिमिरेको अध्यक्षतामा सम्पन्न साधारणसभामा राप्ती नगरपालिका–५ का वडाध्यक्ष सिताराम बल तामाङ प्रमुख अतिथिका रूपमा सहभागी थिए।
कार्यक्रममा चितवन उद्योग संघका जिल्ला अध्यक्षसहित जिल्लाका विभिन्न पालिकामा रहेका उद्योग संघका कार्यसमितिका पदाधिकारी तथा प्रतिनिधिहरूको सहभागिता रहेको थियो। त्यस्तै, राप्ती नगरपालिकाका जनप्रतिनिधिहरूको समेत उपस्थिति रहेको थियो।
साधारणसभामा अध्यक्ष घिमिरेले संस्थाले पछिल्लो अवधिमा गरेका गतिविधि, उपलब्धि तथा आगामी कार्ययोजनाका विषयमा जानकारी गराउँदै स्वागत मन्तव्यसहित संस्थागत प्रतिवेदन प्रस्तुत गरेका थिए। त्यस्तै, कोषाध्यक्ष कृष्णमाया श्रेष्ठले संस्थाको आर्थिक प्रतिवेदन प्रस्तुत गरेकी थिइन्।
सभामा उद्योगी–व्यवसायीले भोग्दै आएका समसामयिक समस्या, उद्योग तथा व्यवसाय क्षेत्रका चुनौती, स्थानीयस्तरमा उद्योग प्रवर्द्धनका सम्भावना तथा उद्योगी–व्यवसायी र स्थानीय सरकारबीचको सहकार्यका विषयमा छलफल भएको थियो।
कार्यक्रमको संयोजन वरिष्ठ उपाध्यक्ष राजेश रुम्बा तामाङले गरेका थिए भने साधारणसभाको समापन पनि वरिष्ठ उपाध्यक्ष तामाङले गरेका थिए।
परेवाकोटको प्राकृतिक तथा पर्यटकीय वातावरणमा सम्पन्न साधारणसभाले राप्ती क्षेत्रको उद्योग तथा व्यवसाय विकासका लागि आपसी सहकार्य, समन्वय र संस्थागत सक्रियतालाई थप प्रभावकारी बनाउने अपेक्षा गरिएको छ।
कार्यक्रम राप्ती समितिका सचिव रामपुकार पाठकले सञ्चालन गर्नुभएको थियो ।
Advertisement
