चितवन/चितवन जिल्लाको कालिका नगरपालिका वडा नं. ८ खोलेसिमलस्थित कालिका नगर अस्पतालमा स्वास्थ्य सेवा सुदृढीकरणका लागि ‘इक्विपिङ कालिका नगर अस्पताल’ (Equipping Kalika Governmental Hospital of Chitwan, GG2691589) परियोजना सञ्चालन हुने भएको छ। विपन्न तथा सर्वसाधारण जनतालाई सहज र सुलभ स्वास्थ्य सेवा पुर्याउने उद्देश्यले आयोजना गरिएको यस ग्लोबल ग्रान्ट परियोजनाका लागि चार सरोकारवाला निकायबीच औपचारिक सहमति पत्र (MoU) मा हस्ताक्षर भएको छ।
रोटरी क्लब अफ चितवन, रोटरी क्लब अफ रत्ननगर, कालिका नगरपालिका र कालिका नगर अस्पताल विकास समितिबीच सम्झौता पत्र आदानप्रदान गरिएको हो।
परियोजनाको विवरण तथा बजेट
कुल अनुमानित लागत: रु. ७५,८९,२००/- (४७,९२८ अमेरिकी डलर)
लाभान्वित जनसङ्ख्या: कालिका नगरपालिकाका सबै घरधुरी तथा इच्छाकामना गाउँपालिकाका केही घरधुरीका गरी दैनिक करिब ३०० जना बिरामी
परियोजना अवधि: २०८३/०५/०४ देखि २०८४/०५/०३ सम्म
बजेट संरचना (सहयोग रकम):
द रोटरी फाउन्डेसन (TRF): रु. २०,३५,५००/- ($13,550)
रोटरी इन्टरनेसनल डिस्ट्रिक्ट ५०३० (अमेरिका): रु. २०,९०,८५०/- ($13,939)
रोटरी इन्टरनेसनल डिस्ट्रिक्ट ३२९२ (नेपाल-भुटान): रु. ४,५०,०००/- ($3,000)
रोटरी क्लब अफ रत्ननगर: रु. ४,५०,०००/- ($3,000)
रोटरी क्लब अफ चितवन: रु. ७५,०००/- ($500)
रोटरी क्लब अफ अटबर्न तथा अन्य क्लबहरू: रु. २०,९०,८५०/- ($13,939)
कालिका नगरपालिका: रु. २,००,०००/- (कोठा तयारी तथा रंगरोगनका लागि)
मुख्य कार्यहरू:
१. १ थान अत्याधुनिक एक्सरे मेसिन र १ थान भिडियो एक्सरे (यूएसजी) मेसिन खरिद, आपूर्ति तथा जडान।
२. उपकरणहरू सञ्चालनका लागि सुरक्षा मापदण्ड अनुसार २ वटा विशेष कोठाको निर्माण, मर्मत तथा रंगरोगन।
३. उपकरण सञ्चालन र मर्मत-सम्भार सम्बन्धी प्राविधिक तालिम सञ्चालन।
हस्ताक्षरकर्ताहरू:
सहमति पत्रमा कालिका नगरपालिका तथा अस्पताल विकास समितिका तर्फबाट नगर प्रमुख विनोद रेग्मी र निमित्त प्रमुख प्रशासकीय अधिकृत/मेसु डा. जीवन खरेलले हस्ताक्षर गर्नुभएको छ। त्यसैगरी रोटरी क्लब अफ चितवनका अध्यक्ष गेहेन्द्रमान श्रेष्ठ, निर्वाचित अध्यक्ष राजन पिया, रोटरी क्लब अफ रत्ननगरका अध्यक्ष दिपेन्द्र चापागाईं तथा पूर्व अध्यक्ष जनक राज पौडेलले सम्झौता पत्रमा हस्ताक्षर गर्नुभएको छ।
सम्झौता अनुसार नगरपालिकाले मेसिन सञ्चालनका लागि आवश्यक दक्ष जनशक्ति व्यवस्थापन गर्नेछ भने hospital ले उपकरणहरूको नियमित सञ्चालन, रेखदेख र मर्मत सम्भारको जिम्मेवारी लिनेछ। रोटरी क्लबहरूले मेसिन खरिद पारदर्शी रूपमा सम्पन्न गरी अनुगमन गर्नेछन्।
यस परियोजनाले स्थानीय तहमा सर्वसाधारणका लागि गुणस्तरीय र सुलभ डाइग्नोस्टिक स्वास्थ्य सेवा प्रदान गर्न ठूलो योगदान पुर्याउने विश्वास लिइएको छ।