विराज भट्टको निर्देशनमा निर्माण भइरहेको बहुप्रतीक्षित नेपाली चलचित्र ‘१२ गाउँ २’ यतिबेला दर्शकमाझ निकै चर्चामा छ। दसैंको अवसरमा प्रदर्शनको तयारीमा रहेको चलचित्रको डबिङको काम अहिले काठमाडौंमा तीव्र गतिमा भइरहेको छ। ‘१२ गाउँ’ र ‘बलिदान’पछि युवा स्टार समिर भट्टको यो तेस्रो चलचित्र हो। चलचित्रको डबिङको काम पूरा नहुँदै टिजर सार्वजनिक गर्ने तयारी भइरहेको स्रोतको दाबी छ।
गोप्य स्रोतका अनुसार ‘बलिदान’का सम्पादक सन्देश शाहले ‘१२ गाउँ २’को टिजर तयार गरिरहेका छन्। टिजरलाई अझ प्रभावशाली बनाउन अभिनेता समिर आफैं सम्पादन कक्षमा बसेर फाइनल टचमा सक्रिय रूपमा लागिरहेका छन्।
समिरको एक्सन, लुक्स र चलचित्रको स्केललाई लिएर दर्शकमाझ पहिलेदेखि नै ठूलो उत्साह छ। अब टिजरले त्यो उत्साहलाई कुन स्तरमा पुर्याउँछ, त्यो भने टिजर सार्वजनिक भएपछि नै थाहा हुनेछ।
हामीले प्राप्त गरेको यो खबर सत्य हो भने, टिजर सार्वजनिक भएसँगै समिरले फेरि एकपटक नेपाली फिल्म उद्योगमा तरंग ल्याउने सम्भावना बलियो देखिन्छ। चलचित्रमा समिरसँगै उनका ‘बा’ तथा निर्देशक विराज भट्ट, अभिनेता अनुपविक्रम शाही लगायतको अभिनय पनि देख्न सकिनेछ।
‘१२ गाउँ’को सफलतापछि समिरले आफूलाई नेपाली फिल्मको नयाँ पुस्ताको खतरानाक स्टारका रूपमा स्थापित गरिसकेका छन्। पहिलो चलचित्रको सफलताबाट राम्रो व्यावसायिक परिणाम हासिल गरेका समिरले अब ‘१२ गाउँ २’बाट कस्तो परिणाम निकाल्छन्, त्यो निकै रोचक प्रतीक्षाको विषय बनेको छ। तर एउटा कुरा के चैं पक्का छ भने – दर्शक हलमा ओइरिए भने कसका बाले रोकेर रोकिन्छ र! तपाईंहरू टिजरको प्रतीक्षामा हुनुहुन्छ? प्रतिक्षामा हुनेले ‘छु’ लेख्नुहोस्, प्रतिक्षामा नहुनेले ‘छैन’ लेख्नुहोस् ।
Advertisement
