भरतपुर/रोटरी क्लब अफ नारायणी मिड टाउनले विश्व फुटबलको महाकुम्भ फिफा विश्वकप २०२६ को फाइनल खेल सामूहिक रूपमा अवलोकन गर्ने उद्देश्यले लर्ड्स सीबीसी प्लाजामा ‘फिफा विश्वकप २०२६ फेलोसिप नाइट’ आयोजना गरेको छ। राति ९:०० बजेबाट सुरु भएको कार्यक्रममा क्लबका सदस्यहरू तथा उनीहरूका परिवारजनको उल्लेखनीय सहभागिता रहेको थियो। आपसी भेटघाट, मित्रता र सौहार्दपूर्ण वातावरणबीच सुरु भएको कार्यक्रम विश्वकपको फाइनल खेल सम्पन्न नहुँदासम्म निरन्तर चलेको थियो।

कार्यक्रममा सहभागीहरूले आ–आफ्नो मनपर्ने टोलीको उत्साहपूर्वक समर्थन गरेका थिए। विशेषगरी अर्जेन्टिना र स्पेनका समर्थकहरूबीच स्वस्थ प्रतिस्पर्धात्मक माहोल देखिएको थियो, जसले कार्यक्रमलाई अझ रोमाञ्चक र अविस्मरणीय बनाएको थियो। रोटरीले प्रवर्द्धन गर्ने फेलोसिपको भावनालाई थप सुदृढ बनाउने उद्देश्यका साथ आयोजित यस कार्यक्रमले सदस्यहरूबीचको आपसी सम्बन्धलाई अझ प्रगाढ बनाउनुका साथै परिवारसहित रमाइलो र स्मरणीय समय बिताउने अवसर प्रदान गरेको क्लबले जनाएको छ।