• होमनाथ न्यौपाने

सामुदायिक प्राकृतिक चिकित्सालय रजहरको सेवा प्रभावकारी

नवलपुर/देवचुली नगरपालिका–१७ रजहरस्थित सामुदायिक प्राकृतिक चिकित्सालयले औषधिभन्दा प्राकृतिक उपचार पद्धतिमार्फत विभिन्न दीर्घ तथा जीवनशैलीसम्बन्धी रोगको उपचार गर्दै बिरामीको विश्वास जित्दै गएको छ। नेपालका विभिन्न जिल्लाबाट उपचारका लागि आउने बिरामीको संख्या पछिल्ला वर्षहरूमा बढ्दै गएको चिकित्सालयले जनाएको छ।
चिकित्सालयमा जलचिकित्सा, माटोचिकित्सा, योग, प्राणायाम, प्राकृतिक आहार, मालिस, फिजियोथेरापी तथा व्यायामजस्ता विधिबाट उपचार गरिन्छ। उपचारसँगै बिरामीलाई स्वस्थ जीवनशैली अपनाउने, सन्तुलित भोजन गर्ने, नियमित व्यायाम गर्ने र मानसिक तनाव कम गर्ने विषयमा समेत परामर्श दिइन्छ।
उपचारका लागि आएका बिरामीहरूका अनुसार लामो समयदेखि ग्यास्ट्रिक, जोर्नी दुख्ने, मोटोपना, मधुमेह, उच्च रक्तचाप तथा ढाड दुखाइ जस्ता समस्यामा प्राकृतिक उपचारबाट उल्लेखनीय सुधार भएको अनुभव गरेका छन्। उनीहरूले औषधिको अत्यधिक प्रयोगभन्दा प्राकृतिक उपचारले शरीरलाई दीर्घकालीन रूपमा स्वस्थ बनाउन सहयोग पुगेको बताएका छन्।
चिकित्सालयका चिकित्सकका अनुसार प्राकृतिक चिकित्सा तत्काल चमत्कारी उपचार नभई शरीरको प्राकृतिक रोग प्रतिरोधात्मक क्षमता बढाउने वैज्ञानिक पद्धति हो। नियमित उपचारसँगै चिकित्सकले दिएको आहार–विहारको पालना गरेमा धेरैजसो जीवनशैलीजन्य रोगमा राम्रो सुधार देखिने बताइएको छ। रोग गम्भीर भएमा विशेषज्ञ चिकित्सकको परामर्शसमेत आवश्यक पर्ने चिकित्सकहरूको सुझाव छ।
चिकित्सालयले आवासीय उपचार, योग प्रशिक्षण, स्वास्थ्य परामर्श तथा रोगअनुसार व्यक्तिगत उपचार योजना उपलब्ध गराउँदै आएको छ। शान्त वातावरण, हरियाली र प्राकृतिक परिवेशले उपचारलाई थप प्रभावकारी बनाएको बिरामीहरूको भनाइ छ।
चिकित्सालयका अनुसार उपचारमा आउने अधिकांश बिरामीमा स्वास्थ्य अवस्थामा उल्लेखनीय सुधार देखिने गरेको छ भने जीवनशैलीमा सकारात्मक परिवर्तन ल्याउनेहरूमा पुनः समस्या दोहोरिने सम्भावना पनि कम हुने गरेको अनुभव रहेको छ। यही कारण प्राकृतिक उपचारप्रति सर्वसाधारणको आकर्षण बढ्दै गएको चिकित्सालयले जनाएको छ।