भरतपुर/चितवन उद्योग संघको आयोजना तथा नेपाल चार्टर्ड एकाउन्टेन्ट संघ, बागमती प्रदेशको सहकार्यमा आ.व.०८३/०८४ को बजेट र आर्थिक विधेयकले गरेको व्यवस्था तथा ती व्यवस्थाले उद्योग, व्यवसायमा पार्ने प्रभाव र सम्बोधन गर्नुपर्ने विषयमा अन्तरक्रिया कार्यक्रम सम्पन्न भएको छ ।

चितवन उद्योग संघका अध्यक्ष मदन घिमिरेले स्वागतसँगै कार्यक्रमको विषयमा जानकारी गराउनु भएको कार्यक्रममा आन्तरिक राजश्व कार्यालय चितवनका प्रमुख कर अधिकृत पुण्य विक्रम खड्काले हाल नेपाल सरकारले ल्याएको कर छुट नीतिले दर्ता भई कारोबार नगरी वर्षौदेखिको कर तिर्न बाँकी देखिएका उद्योग तथा व्यवसायहरुलाई ठूलो सहयोग पुगेको बताउनुभयो ।

छलफल कार्यक्रममा नेपाल चार्टर्ड एकाउन्टेन्ट संघ, बागमती प्रदेशका अध्यक्ष सन्तोष रेग्मी र नेपाल चार्टर्ड एकाउन्टेन्ट संघ, बागमती प्रदेशका सचिव विशाल भट्टराईले आ.व.०८३/०८४ को बजेट र आर्थिक विधेयकले गरेको व्यवस्था तथा ती व्यवस्थाले उद्योग, व्यवसायमा पार्ने प्रभाव र सम्बोधन गर्नुपर्ने विषयहरुमा प्रस्तुतिकरण गर्नुभएको थियो । छलफलमा आन्तरिक राजश्व कार्यालय चितवनका कर अधिकृत मोहन प्रसाद आचार्यले उद्योगीहरुबाट आएका जिज्ञासाहरुको समाधान गर्नुभएको थियो ।

छलफल कार्यक्रममा चितवन उद्योग संघ, गभर्निङ काउन्सिलका अध्यक्ष भेषराज दुवाडी, चितवन उद्योग संघ, पूर्व अध्यक्षहरु त्रिलोचन कँडेल, सोमराज मरहट्टा, चितवन उद्योग संघका प्रेस सल्लाहकार वसन्त पराजुली, चितवन उद्योग संघका उपाध्यक्षहरु गजेन्द्र अधिकारी, ताराबहादुर कार्की, परमेश्वर भण्डारी, वस्तुगत समितिका अध्यक्ष तथा पदाधिकारीहरु, चितवन उद्योग संघका पालिका समितिका अध्यक्ष तथा पदाधिकारीहरु, चितवन उद्योग संघका कार्यसमिति सदस्यहरु, पूर्व कार्यसमिति क्लवका पदाधिकारी एवम् सदस्यहरु, महिला उद्यमी मञ्चकी अध्यक्ष सरिता खनाल पौडेल, युवा उद्यमी मञ्चका अध्यक्ष भरत दवाडी लगायतको उपस्थिति रहेको थियो ।

चितवन उद्योग संघका कार्यकारी निर्देशक गणेश प्रसाद सिलवालले सञ्चालन गर्नुभएको कार्यक्रमलाई चितवन उद्योग संघका उपाध्यक्ष एवम् नीति तथा पाठशाला विभागका प्रमुख गोपाल प्रसाद गैरेले धन्यवाद मन्तव्य सहित कार्यक्रमको समापन गर्नुभएको थियो ।