नारायणगढ/दियालो परिवार, नारायणगढले आज मिति २०७७ कार्तिक ६ गते, विहीबार मिति २०७७ असोज १३ गते सम्पन्न संस्थाको ३२औं अधिवेशन तथा ४३ औं बार्षिक साधारण सभाबाट निर्वाचित कार्यसिमितिलाई पद हस्तान्तरण तथा विजयादशमी, शुभ दिपावली, नेपाल सम्बत् र छठ पर्वको अवसरमा कोभिड १९ को सम्पूर्ण सुरक्षाका उपायहरु अपनाई शुभकामना आदान प्रदान कार्यक्रम सम्पन्न गरियो ।
भरतपुर महानगरपालिका वडा नं १ का वडा अध्यक्ष जयराम श्रेष्ठको प्रमुख आतिथ्यतामा सम्पन्न उक्त कार्यक्रममा स्थानिय गैह्र सरकारी संस्था युथ क्लबका अध्यक्ष रामबाबु श्रेष्ठको समेत उपस्थिति रहेको थियो । कार्यक्रममा संस्थाका निवर्तमान अध्यक्ष रसिक प्रधानले नवनिर्वाचित अध्यक्ष ईञ्जिनियर सुरेश खनाललाई मान्युट हस्तान्तरण गरी औपचारिक रुपमा पद हस्तान्तरण गरियो । निवर्तमान अध्यक्ष रसिक प्रधानले कार्यक्रमको औचित्य माथि प्रकाश पार्नुहुँदै शुभकामना मन्तव्य व्यक्त गर्नुभएको थियो । संस्थाका कार्यकारी निर्देशक राजगोविन्द शिल्पकारले सञ्चालन गर्नुभएको सो कार्यक्रममा साधारण सदस्य तुलसीप्रसाद श्रेष्ठ, कार्यसमितिका सदस्य निर्मला अर्याल, सल्लाहकार निर्मला पिया, युथ क्लबका अध्यक्ष रामबाबु श्रेष्ठले क्रमशः शुभकामना मन्तव्य राख्नुभएको थियो ।
प्रमुख अतिथि वडा अध्यक्ष जयराम श्रेष्ठले ४० वर्षभन्दा अघिदेखि चितवन जिल्ला लगायत बाहिरी जिल्लामा समेत आफ्नो साख राख्न सफल यस दियालो परिवार पहिलेदेखि नै नगरपालिकासँग हातेमालो गर्दै अगाडी बढेको र आगामी दिनमा पनि त्यसरी नै सहयोग भईरहने समेत जानकारी गराउनुभयो र यो कार्यकालको शुभकामना व्यक्त गर्नुभयो । संस्थाका सचिव ईश्वरराज पण्डितले स्वागत गर्नुभएको उक्त कार्यक्रमको अध्यक्षता संस्थाका अध्यक्ष ईञ्जिनियर सुरेश खनालले गर्नुभएको थियो ।
