भरतपुर/चितवन प्रदर्शनी केन्द्र, भरतपुरमा ०७ गतेदेखि शुरु भएको राष्ट्रिय स्वतन्त्र पार्टीको प्रथम राष्ट्रिय महाधिवेशनको अवसरमा चितवन उद्योग संघमा आईपुग्नु भएका नेपाल सरकार उद्योग, वाणिज्य तथा आपूर्ति मन्त्री गौरी कुमारीसँग औद्योगिक प्रबद्र्धनका विषयमा छलफल कार्यक्रम सम्पन्न भएको छ ।

चितवन उद्योग संघका उपाध्यक्ष एवम् नीति तथा पाठशाला विभागका विभागीय संयोजक गोपाल प्रसाद गैरेले स्वागतसँगै संघका परियोजनाहरुको बारेमा जानकारी गराउनु भएको छलफल कार्यक्रममा नेपाल सरकार उद्योग, वाणिज्य तथा आपूर्ति मन्त्री गौरी कुमारीले चितवन उद्योग संघको पहलकदमीमा अगाडि बढेको शक्तिखोर औद्योगिक क्षेत्रको सञ्चालन गर्ने विषयमा पहल भईरहेको र छिट्टै यसलाई अगाडि बढाउने प्रतिवद्धता समेत व्यक्त गर्नुभयो । मन्त्री कुमारीले नियम उल्लंघन गर्ने उद्योगहरुको विद्युत लाइन काटिएको र नीति, प्रक्रियामा आई सञ्चालन भएका उद्योगहरुलाई छुट सहित सहयोग समेत गरिएको बताउनुभयो ।

छलफलमा चितवन उद्योग संघ, पूर्व अध्यक्षहरु त्रिलोचन कँडेल, राजु पौडेल, हरिप्रसाद सुवेदी, कार्यसमिति सदस्य अर्जुन सापकोटाले उद्योग सञ्चालनका क्रममा भएका समस्या, सरकारबाट उद्योगीहरुलाई हुनसक्ने अपेक्षाका बारेमा आ–आफ्नो धारणा राखेका थिए । छलफलमा चितवन उद्योग संघका उपाध्यक्षहरु परमेश्वर भण्डारी, विशाल चापागाईं, कार्यसमिति सदस्यहरु सृजना सोती, शेषमणी भट्टराई, प्रकाश पौडेल, अनुजराज पन्त, रञ्जित बराकोटी लगायतको उपस्थिति रहेको थियो ।

चितवन उद्योग संघका कार्यकारी निर्देशक गणेशप्रसाद सिलवालले सञ्चालन गर्नुभएको छलफल कार्यक्रमलाई चितवन उद्योग संघका उपाध्यक्ष ताराबहादुर कार्कीले धन्यवाद सहित समापन गर्नुभएको थियो ।