पृथ्वी राजमार्गअन्तर्गत मुग्लिङ–मलेखु सडकखण्डमा पुनः कालोपत्रको काम सुरु हुने भएको छ । अलकत्राको अभावमा रोकिएको निर्माण कार्य ५ गतेदेखि अघि बढाउन लागिएको हो । नागढुङ्गा–मुग्लिङ सडक आयोजना पश्चिम खण्ड कार्यालयका सूचना अधिकारी सचेन्द्र मिश्रका अनुसार हुग्दीदेखि जवाङ खोलासम्मको सडकमा कालोपत्रको तयारी गरिएको छ । ३० टन अलकत्रा आइसकेकाले तत्काल ७०० मिटर सडक कालोपत्र गरिने र असारभित्र तीन किलोमिटर सडक कालोपत्र गर्ने योजना रहेको उहाँले बताउनुभयो ।

यस खण्डका छ मध्ये चार पुल निर्माण अन्तिम चरणमा पुगेका छन् । हालसम्म सडक निर्माणको करिब ४३ प्रतिशत काम सम्पन्न भएको छ । ३८ दशमलव ८६ किलोमिटर लामो यो सडकखण्ड स्तरोन्नतिको जिम्मा शर्मा–जेडआइसिजीले रु चार अर्ब ८० करोड ५९ लाखमा लिएको हो । विश्व बैंकको सहयोगमा निर्माण भइरहेको यो सडक काठमाडौँ आवतजावत गर्ने प्रमुख मार्ग हो ।