भरतपुर/चितवन उद्योग संघले बागमती प्रदेश उद्योग परिसंघसँगको सहकार्य, वल्डवाईड टेक्निकल प्रा.लि.को प्राविधिक सहयोग र इन्स्योर परियोजनाको आर्थिक सहयोगमा डिजिटल मार्केटिङ्ग सम्बन्धि ९६ घण्टाको सिप अभिवृद्धि तालिमको समापन गरिएको छ ।
वागमती प्रदेश उद्योग परिसंघका अध्यक्ष त्रिलोचन कँडेलको अध्यक्षको अध्यक्षतामा सम्पन्न तालिम शुभारम्भ कार्यक्रममा चितवन उद्योग संघका उपाध्यक्षद्वय तारा बहादुर कार्की र गोपाल प्रसाद गैरेले शुभकामना सहित तालिममा सहभागी मध्येबाट एक–एक जनालाई आफू आवद्ध संस्थाहरुमा प्रशिक्षार्थी कामदारको रुपमा अवसर दिने प्रतिवद्धता व्यक्त गर्नुभएको थियो ।
तालिम समापन कार्यक्रममा इन्स्योर परियोजनाका टेक्निकल कोअडिनेटर चक्रपाणी तिमिल्सिनाले तालिममा सिकेको सिपलाई व्यवहारमा उतार्न सम्पूर्ण सहभागीहरुलाई अनुरोध गर्नुभयो । तिमिल्सिनाले अझै यस्ता खाले तालिम र यसभन्दा फरक खालका तालिमहरुको लागि आफूहरु चितवन उद्योग संघ र वल्डवाईड टेक्निकल प्रा.लि.सँग सहकार्य गर्न तयार रहेको बताउनुभयो ।
तालिम समापन कार्यक्रममा प्रशिक्षक ई. सन्तोष श्रेष्ठले तालिममा सहभागीहरु मध्येबाट उत्कृष्ट ४ जना प्रशिक्षार्थीहरुलाई अझै एडभान्स तालिमको व्यवस्थाका साथै रोजगार प्रदायक संस्थाहरुसँग सहकार्यका लागि पहल गर्ने बताउनुभयो । त्यस्तै प्रशिक्षार्थीको तर्फबाट अजय महतोले तालिममा सिकेका विषयहरुमा आफ्ना भनाईहरु राख्नु भएको थियो ।
प्रशिक्षकद्वय ई. सन्तोष श्रेष्ठ र दिनेश विश्वकर्माले प्रशिक्षण दिनुभएको तालिम समापन कार्यक्रमलाई चितवन उद्योग संघका कार्यक्रम अधिकृत कल्पना आचार्यले सञ्चालन गर्नुभएको थियो भने वागमती प्रदेश उद्योग परिसंघ अध्यक्ष त्रिलोचन कँडेलले धन्यवाद मन्तब्य सहित कार्यक्रम समापन गर्नुभएको थियो ।